اراضی کی نیلامی رپورٹ بنانے کے لیے مانگے 6 لاکھ روپے، اے سی بی نے سڈکو افسر کو دھر دبوچا

مہاراشٹر کے نیوی ممبئی سے ایک چونکا دینے والی واردات سامنے آئی ہے، جہاں سٹی اینڈ ڈیولپمنٹ کارپوریشن آف مہاراشٹر لمیٹیڈ (سڈکو) کے ایک افسر کو 6 لاکھ روپے رشوت لیتے ہوئے رنگے ہاتھوں پکڑا گیا ہے۔ اراضی نیلام ہونے کے بعد اراضی کی رپورٹ دینے کے لیے 6 لاکھ روپئے کی رشوت لی گئی تھی۔ اس معاملے میں اینٹی کرپشن بیورو(اے سی بی) نے دو لوگوں کو رنگے ہاتھوں پکڑا، جن میں سڈکو کے لینڈ ریکارڈ کے ڈپٹی سپرنٹنڈنٹ دلیپ بگولے بھی شامل ہیں۔

دریں اثناء موصولہ اطلاع کے مطابق ملزمین نے شکایت کنندگان سے 9 لاکھ روپے کی مانگ کی تھی۔ اینٹی کرپشن بیورو کے اس اقدام سے سڈکو کے حلقوں میں کھلبلی مچ گئی ہے اور اس سے بدعنوانی پر قابو پانے میں مدد ملے گی۔ شکایت کنندگان نے نینا علاقے میں واقع ایک اراضی کی نیلامی کے لیے سڈکو میں درخواست دی تھی۔

اس کے بعد محکمہ کے ڈپٹی سپرنٹنڈنٹ دلیپ بگولے اور ان کے ساتھی کلیم الدین شیخ نے رپورٹ دینے میں تاخیر کی تھی۔ انہوں نے رپورٹ کے لیے شکایت کنندگان سے 9 لاکھ روپے کی مانگ کی تھی لیکن طویل بات چیت کے بعد یہ سودا 6 لاکھ روپے میں ہوا تھا۔ اس کے بعد 6 لاکھ روپے کی رشوت لیتے ہوئے سڈکو کو افسر رنگے ہاتھ پکڑ لیا گیا۔

اس سنسنی خیز واقعہ سے سڈکو کے آفس میں زبردست کھلبلی مچ گئی ہے۔ یہ معاملہ انسداد بدعنوانی ایکٹ کے تحت مقدمہ درج کیا گیا اور اس کے ساتھ ہی معاملے میں مزید جانچ شروع کردی گئی ہے جس کے بعد کہا جارہا ہے کہ کچھ اور لوگ بھی اس بدعنوانی میں بے نقاب ہوسکتے ہیں۔