تاریخی ’ڈانڈی مارچ‘ کے 91 سال، گہلوت نے پی ایم مودی سے کی خصوصی اپیل

جے پور: راجستھان کے وزیر اعلی اشوک گہلوت نے وزیر اعظم نریندر مودی سے ہندوؤں میں اچھوت کی روایت کے خلاف مہم چلانے کی اپیل ہے۔ تاریخی ڈانڈی مارچ کے 91 سال مکمل ہونے کے موقع پر اشوک گہلوت نے آج یہاں بجاج نگر سے گاندھی سرکل تک پیدل مارچ کیا۔ اشوک گہلوت نے کانگریس کارکنان، سماجی رضاکاروں کے ساتھ مارچ کرتے ہوئے گاندھی سرکل تک پہنچے اور مہاتما گاندھی کے مجسمے پر گلپوشی کی۔

اشوک گہلوت نے ملک میں مذہب پر مبنی سیاست کرنے والی تنظیموں کو سخت تنقید کا نشانہ بناتے ہوئے کہا کہ یہ لوگ ابھی ہندو اور مسلمانوں کی بات کرتے ہیں اور پھر آگے چل کر وہ دلتوں اور اعلی ذات کے مابین امتیازی سلوک کی بات کرسکتے ہیں۔ انہوں نے کہا کہ یہ سب ووٹ کی سیاست کے لئے کیا جا رہا ہے۔ کسانوں کی تحریک کا ذکر کرتے ہوئے اشوک گہلوت نے کہا کہ بھارتیہ جنتا پارٹی (بی جے پی) کی حکومت کسانوں کی کوئی بات نہیں سن رہی ہے، جبکہ کسانوں کی تحریک میں دو سو سے زیادہ کسان مر چکے ہیں۔

اشوک گہلوت نے اس خدشے کا اظہار کیا کہ مذہب کی سیاست کرنے والی بی جے پی آگے ہندوؤں کے مابین بھی امتیاز برت سکتی ہے۔ انہوں نے وزیر اعظم سے راشٹریہ سویم سیوک سنگھ کے ساتھ بات چیت کرنے اور ملک میں ذات پات کے خلاف مہم چلانے کا مطالبہ کیا۔ اس موقع پر سٹیزن فورم کے سوائی سنگھ، گردھاری لال بپنا اور لاڈکماری جین نے بھی کارکنوں سے خطاب کیا۔