آئی پی ایل 2020: آج علی خان بن سکتے ہیں آئی پی ایل کھیلنے والے پہلے امریکی کرکٹر

آئی پی ایل کا خمار اس وقت اپنے عروج پر ہے۔ خالی اسٹیڈیم کے ساتھ کھیلے جا رہے میچوں میں بھی ٹیمیں پورے جوش کے ساتھ کھیلتی ہوئی نظر آ رہی ہیں، اور ابھی تک کھیلے گئے سبھی چار مقابلے انتہائی دلچسپ ہوئے۔ آج پانچویں مقابلے میں ممبئی انڈینز ٹیم کولکاتا نائٹ رائیڈرس سے دو دو ہاتھ کرتی ہوئی نظر آئیں گی۔ لیکن آج کے میچ کی ایک خاص بات یہ ہے کہ آئی پی ایل میں پہلے امریکی کھلاڑی کی انٹری ہو سکتی ہے۔ اس کھلاڑی کا نام ہے علی خان۔

دراصل 29 سالہ علی خان کو کولکاتا نائٹ رائیڈرس نے انگلینڈ کے زخمی تیز گیندباز ہیری گرنے کی جگہ ٹیم میں شامل کیا ہے۔ امکان ظاہر کیا جا رہا ہے کہ کولکاتا علی کو فائنل الیون میں جگہ دے گی کیونکہ انھوں نے اپنی گیندبازی سے کئی لوگوں کو حیران کیا ہے۔

پاکستان کے پنجاب میں پیدا ہوئے علی خان جب 18 سال کے تھے تبھی ان کے اہل خانہ اوہیو میں بس گئے۔ اسی وقت سے علی امریکہ کے لیے کرکٹ کھیل رہے ہیں۔ انھوں نے سی پی ایل (کیریبین پریمیر لیگ)، پی ایس ایل، گلوبل ٹی 20 اور بی پی ایل جیسے ٹی 20 ٹورنامنٹ میں اچھی کارکردگی کا مظاہرہ کیا ہے۔ حال ہی میں منعقد ہوئے کیریبین پریمیم لیگ میں علی نے ترینباگو نائٹ رائیڈرس کی نمائندگی کی تھی اور ٹیم کو خطاب دلانے کے سفر میں اہم کردار نبھایا تھا۔