کرسمس پر روسی حملوں کی امریکہ نے کی شدید مذمت، عالمی برادری سے یوکرین کا ساتھ دینے کی اپیل

کرسمس کی صبح روس کے ذریعہ یوکرین پر کئے گئے سلسلہ وار حملوں سے امریکہ شدید غصے میں آ گیا ہے۔ صدر بائیڈن نے حملے کی شدید مذمت کرتے ہوئے کہا کہ امریکہ یوکرین کے ساتھ مضبوطی سے کھڑا ہے۔ بائیڈن نے یہ بھی کہا کہ امریکی دفاعی محکمہ یوکرین کو دیئے جانے والے اسلحوں کی سپلائی میں اضافہ کرے گا۔ انہوں نے کہا کہ کرسمس کے شروعاتی گھنٹوں میں روس نے یوکرین کے شہروں اور توانائی پلانٹ پر ڈرون اور میزائلوں سے حملہ کیا۔ اس شرمناک حملے کا مقصد سردیوں کے دوران یوکرینی لوگوں کو گرمی اور بجلی تک پہنچ کو کاٹنا اور اس کے گریڈ کو تحفظ کے خطرے میں ڈالنا تھا۔

امریکی صدر بائیڈن نے عالمی برادری سے یوکرین کے ساتھ کھڑے ہونے کی اپیل کرتے ہوئے یوکرین کو کیے جانے والے اسلحوں کی سپلائی بڑھانے پر زور دیا۔ انہوں نے کہا "میں واضح کر دوں کہ یوکرینی عوام امن اور تحفظ میں رہنے کے حق دار ہیں۔ امریکہ اور عالمی برادری کو یوکرین کے ساتھ کھڑا رہنا چاہیے۔ جب تک کہ وہ روس کی جارحیت پر فتح حاصل نہیں کر لیتا"۔

بائیڈن نے اپنے بیان میں یوکرین کو امریکی دفاعی سپلائی پر روشنی ڈالی اور بتایا کہ کیسے امریکہ روس کے خلاف یوکرین کو مضبوط کرنا جاری رکھے گا۔ انہوں نے کہا کہ حال کے مہینوں میں امریکہ نے یوکرین کو سینکڑوں ایئر ڈیفنس میزائلیں دی ہیں۔ ساتھ ہی محکمہ دفاع کو یوکرین کو اسلحوں کی سپلائی جاری رکھنے کی ہدایت دی ہے۔ صدر نے کہا کہ امریکہ روسی فوجیوں کے خلاف اپنے دفاع میں یوکرین کی پوزیشن کو مضبوط کرنے کے لیے ضروری کوشش کرنا جاری رکھے گا۔

اس سے قبل کرسمس کے موقع پر صدر زیلنسکی نے یوکرین کے توانائی بنیادی ڈھانچے کو نشانہ بنا کر بڑے پیمانے پر میزائل اور ڈرون حملہ کرنے کے لیے روس کی مذمت کی اور حملے کو غیر انسانی بتایا۔ واضح ہو کہ کرسمس کی صبح روس نے یوکرین پر 70 سے زائد میزائلوں اور 100 سے زائد ڈرون سے حملہ کر دیا تھا۔ اس حملے میں یوکرین کا ایک تھرمل پاور پلانٹ تباہ ہو گیا تھا۔ جس کے بعد یوکرین کے کئی شہروں میں بلیک آؤٹ ہو گیا۔