تہران پر حملہ: شریف یونیورسٹی نشانہ، 13 افراد جاں بحق؛ ایران کے جوابی وار سے حیفہ میں کھلبلی

امریکہ اور اسرائیل کی جانب سے جاری جارحیت کے دوران ایران کی راجدھانی تہران کے جنوب مغربی علاقہ اسلام شہر کے قریب ایک رہائشی عمارت پر فضائی حملے سے پورا علاقہ لرز اٹھا۔ پیر کی صبح ہونے والے اس ہولناک حملے میں کم از کم 13 افراد جاں بحق ہو گئے۔ ایرانی میڈیا کے مطابق حملہ شہر کے قریبی علاقے میں ہوا تاہم عمارت کو نشانہ بنائے جانے کی وجہ تاحال واضح نہیں ہے۔مقامی خبر رساں ایجنسیوں نے حملے کے بعد علاقے میں بڑے پیمانے پر تباہی کی اطلاع دی ہے اور امدادی کارروائیاں جاری ہیں۔ کئی افراد کے ملبے تلے دبے ہونے کا خدشہ ظاہر کیا گیاہے۔ حکام کا کہنا ہے کہ متوفیوں کی تعداد میں اضافہ ہو سکتا ہے کیونکہ متعدد افراد شدید زخمی ہیں اور کچھ اب بھی پھنسے ہونے کا اندیشہ ہے۔ وہیں ایران کی آر جی سی نے ایک بار پھر اسرائیل کے حیفہ شہر پر میزائل سے حملہ کردیا جس میں دو لوگوں کی موت ہوگئی۔

اسی دوران تہران کی شریف یونیورسٹی آف ٹیکنالوجی کو بھی نشانہ بنایا گیا۔ ایرانی میڈیا کے مطابق حملے میں یونیورسٹی کی کچھ عمارتوں کے ساتھ ساتھ قریبی گیس سپلائی کے مرکز کو بھی نقصان پہنچا تاہم، یونیورسٹی کیمپس کے اندر درست ہدف ابھی تک واضح نہیں ہے۔ بتادیں کہ رواں سال 28 فروری کو ایران پر مسلط کی گئی جنگ کی وجہ سے ملک بھر کے تعلیمی ادارے بند ہیں اور تمام کلاسز آن لائن ہو رہی ہیں جس سے کیمپس پہلے ہی خالی پڑے ہیں۔ مقامی لوگوں کے مطابق کئی گھنٹے تک آسمان میں نیچے اُڑتے جنگی طیاروں کی آوازیں گونجتی رہیں جس سے خوفناک صورتحال میں مزید اضافہ ہو گیا۔

قابل غور ہے کہ اس یونیورسٹی پر اس سے قبل ایران کے بیلسٹک میزائل پروگرام اور فوجی تحقیق سے روابط کی وجہ سے متعدد ممالک کی طرف سے پابندیاں لگائی جا چکی ہیں۔ یہ پروگرام بنیادی طور پر ایران کے نیم فوجی گروپ پاسداران انقلاب کے کنٹرول میں ہے۔ دریں اثناء اسرائیل میں سکیورٹی اداروں نے میزائل الرٹ جاری کیا جبکہ متحدہ عرب امارات کے شہر دبئی میں بھی ایسے ہی دو الرٹ جاری کیے گئے۔ وہاں فضائی دفاعی نظام کو فعال کر دیا گیا ہے تاہم یہ واضح نہیں ہو سکا کہ ایران کے کن اہداف کو نشانہ بنایا گیا۔ کویت نے یہ بھی دعویٰ کیا ہے کہ اس نے ممکنہ خطرات کو روکنے کے لیے اپنے فضائی دفاعی نظام کو راتوں رات کئی بار استعمال کیا۔ دریں اثنا، ایران کے سرکاری اخبار ’ایران ڈیلی‘ نے آن لائن اطلاع دی ہے کہ ایران کے مقدس شہرقم میں ایک رہائشی علاقے پر فضائی حملے میں کم از کم 5 افراد مارے گئے۔

ادھر ایران نے اسرائیلی شہر حیفہ پر ایک بار پھر میزائل حملہ کیا ہے۔ اس حملے میں اسرائیل کو سب سے زیادہ نقصان پہنچا ہے۔ حیفہ شہر پر ایران کے حملے میں دو افراد ہلاک اور دو لاپتہ ہوگئے ہیں۔ ایران کے نئے حملوں کے بعد وسطی اسرائیل میں سائرن بج رہے ہیں۔ درحقیقت اتوار کو ایران نے اسرائیل پر 4 میزائل داغے جن میں سے ایک بھاری تمیزائل حیفہ شہر میں ایک اپارٹمنٹ بلاک پر گرا جس سے عمارت کا آدھا حصہ منہدم ہو گیا۔ اس دوران جو حصہ کھڑا تھا وہ بھی غیر متوازن ہو گیا جس سے اس کے گرنے کا خطرہ بڑھ گیا تھا جس کی وجہ سے ریسکیو کا کام مزید مشکل ہو گیا ہے۔