ہندوستان اور ای یو کے درمیان ’مدر آف آل ڈیلز‘ سے امریکہ برہم، ٹرمپ کے قریبی نے بتایا ’خود کے خلاف جنگ میں مدد‘

ہندوستان اور یورپی یونین (ای یو) نے طویل عرصے سے جاری آزاد تجارتی معاہدے (ایف ٹی اے) مذاکرات مکمل کرلیے ہیں۔ یہ اقدام ایسے وقت میں سامنے آیا ہے جب امریکی صدر ڈونالڈ ٹرمپ کی ٹیرف پالیسیوں سے دنیا کے کئی ممالک کے ساتھ تجارتی تعلقات میں تناؤ بڑھ گیا ہے۔ امریکہ نے ہندوستان پر خاص طور پر روس سے تیل خریدنے کے سخت الزامات عائد کیے ہیں۔

واضح رہے کہ ہندوستان اور یورپی یونین کے درمیان ایف ٹی اے مذاکرات 2007 میں شروع ہوئے تھے۔ اب فریقین نے کہا ہے کہ معاہدہ ’قانونی جانچ پڑتال‘ کے لیے تیار ہے۔ اس کا باقاعدہ اعلان 27 جنوری کو کیا جا سکتا ہے۔ یورپی کمیشن کی صدرارسولا وان ڈیر لیین نے اسے ’مدرآف آل ڈیلز‘ (تمام معاہدوں کی ماں) کہا ہے۔

اس دوران امریکی وزیر خزانہ اسکاٹ بیسنٹ نے کہا کہ ہندوستان روس سے خام تیل خریدتا ہے، اسے صاف کرتا ہے اور پھر یورپی ممالک وہی تیل مصنوعات خریدتے ہیں۔ ان کے بقول اس سے روس یوکرین جنگ کی مالی امداد ہو رہی ہے۔ انہوں نے دعویٰ کیا کہ یہی وجہ ہے کہ امریکہ نے ہندوستان پر25 فیصد ٹیرف عائد کیا جسے بعد میں بڑھا کر50 فیصد کر دیا گیا۔ ڈونالڈ ٹرمپ کی قیادت میں امریکہ نے کہا کہ اس نے روس یوکرین جنگ کو ختم کرنے کے لیے یورپ سے زیادہ ’قربانیاں‘ دی ہیں۔ ٹرمپ انتظامیہ کا ماننا ہے کہ یورپ خود کے خلاف چل رہی جنگ کو ہی پیسہ دے رہی ہے۔

امریکہ نے ہندوستان پرکل 50 فیصد محصولات عائد کر رکھے ہیں۔ اس میں سے 25 فیصد خاص طور پر روس سے تیل کی خریداری کی وجہ سے ہے۔ یہ فیصلہ اگست 2025 میں لیا گیا تھا۔ اس سب کے درمیان ڈونالڈ ٹرمپ نے ہندوستان کے 77 ویں یوم جمہوریہ پر مبارکباد دی ہے۔ انہوں نے کہا کہ ہندوستان اور امریکہ دنیا کی سب سے بڑی اور قدیم جمہوریتیں ہیں اور ان کے تعلقات تاریخی ہیں۔ ریپبلکن سینیٹر ٹیڈ کروز نے مبینہ طور پر کہا کہ ٹرمپ کی ٹیرف پالیسی امریکہ کو نقصان پہنچا سکتی ہے۔ میڈیا رپورٹ کے مطابق انہوں نے ٹرمپ کو خبردار کیا کہ اس سے انتخابی نقصان اور سیاسی بحران پیدا ہو سکتا ہے۔

دوسری طرف امریکہ کی سخت تجارتی پالیسی کی وجہ سے کینیڈا بھی اپنے تعلقات کی تجدید کر رہا ہے۔ وزیراعظم مارک کارنی کی قیادت میں کینیڈا ہندوستان کو ایک اہم اسٹریٹجک اور تجارتی شراکت دار مانتا ہے۔ امریکہ نے کینیڈا پر بھاری محصولات عائد کرنے کی دھمکی بھی دی ہے۔ ماہرین کا خیال ہے کہ یورپی یونین اور کینیڈا کے ساتھ تعلقات مضبوط کرنے سے ہندوستان کو فائدہ ہو سکتا ہے۔ اس سے ہندوستان کو توانائی کی حفاظت، نئی منڈیوں اور امریکی ٹیرف کے دباؤ سے کچھ راحت ملنے کی امید ہے۔