پوری دنیا میں فٹبال کا بخار، امبیڈکر اسٹیڈیم میں راجستھان یونائیٹڈ کا میچ نیروکا ایف سی سے ہفتہ کو

پوری دنیا میں اس وقت فٹبال کا بخار چڑھا ہوا ہے اور اسی بخار کے بیچ دہلی گیٹ پر واقع مشہور امبیڈکر اسٹیڈیم میں راجستھان یونائیٹڈ ہیرو لیگ کا اپنا پہلا ہوم میچ منی پور کی نیروکا ایف سی سے ہفتہ کو  دوپہر 2 بجے کھیلے گی۔ راجستھان یونائیٹڈ نے امبیڈکر اسٹیڈیم  کو ہیرو لیگ کے اس سیزن میں اپنا گھریلو میدان بنایا ہوا ہے اس لئے اپنے تمام گھریلو یعنی ہوم  میچ وہ اسی اسٹیدیم میں کھیلے گی۔

واضح رہے کہ راجستھان یونائیٹڈ نے ابھی تک چار میچ کھیلے ہیں جو اپنی حریف ٹیم کے گھریلو اسٹیڈیم میں کھیلے ہیں جن میں سے اس نے دو جیتے ہیں، ایک ڈرا  کیا ہے اور ایک میچ میں ٹیم کو ہار کا سامنا کرنا پڑا ہے۔

میچ سے پہلے کی پریس کانفرنس سے خطاب کرتے ہوئے راجستھان یونائیٹڈ کے کوچ پشپیندر کنڈو نے کہا کہ وہ اسٹیڈیم میں اپنی واپسی کو لے کر بہت پرجوش ہیں کیونکہ ان کے کیریئر میں اس اسٹیڈیم کا بہت بڑا دخل رہا  ہے۔ انہوں نے کہا کہ ’’میرے پاس امبیڈکر اسٹیڈیم کی بہت اچھی یادیں ہیں۔ میں نے اپنے کیریئر کا آغاز مغل کلب کی جانب سے کھیلتے ہوئے کیا تھا اور اب یہاں میں اپنی ٹیم کے ہیڈ کوچ کے طور پر واپسی کر رہا ہوں جو میرے لئے بہت اعزاز کی بات ہے اور یہ لمحہ  میرے لئے ایک جذباتی لمحہ ہے۔‘‘

کوچ کنڈو نے کہا کہ ان کی ٹیم پورے پوائنٹس حاصل کرنے کے لئے میدان میں اترے گی۔ انہوں نے ساتھ ہی کہا کہ یہ میچ دہلی میں فٹبال شائقین میں ایک نیا جذبہ  پیدا کرے گا۔ کووڈ کی وجہ سے دو سال سے فٹبال کے شائقین اسٹیڈیم سے دور تھے ان کے لئے یہ میچ کسی تحفہ سے کم نہیں  ہے کیونکہ انہیں ایک اچھے کھیل کا مشاہدہ کرنے کا موقع ملے گا۔ شائقین کے سامنے کھیلنا ہمیشہ کھلاڑیوں کے لئے ایک بہترین موقع ہوتا ہے اور وہ اسے پسند کرتے ہیں۔

راجستھان یونائیٹڈ ایف سی کے کپتان مارٹن شاویز نے بھی امبیڈکر اسٹیڈیم میں کھیلنے پر خوشی  کا اظہار کیا۔ انھوں نے کہا کہ ’’ہم نے اپنے گھریلو میدان سے دور کھیلتے ہوئے اچھے نتائج حاصل کئے ہیں اور پوری امید ہے کہ گھریلو میدان میں بھی ہماری ٹیم اچھے کھیل کا مظاہرہ کرے گی۔‘‘ منی پور کی ٹیم نیروکا ایف سی کے کوچ ہندوستان کے بہترین کھلاڑی کھوگین سنگھ ہیں جن کو امید ہے کہ ان کی ٹیم شاندار کھیل کا مظاہرہ کرے گی۔ کھوگین سنگھ نے صحافیوں سے خطاب کرتے ہوئے کہا کہ ان کے پاس بھی امبیڈکر اسٹیدیم کی بہترین یادیں ہیں۔