تلگو اداکار جے پرکاش ریڈی کا حرکت قلب کے بند ہونے سے انتقال

حیدرآباد: تلگو اداکار جے پرکاش ریڈی کا منگل کی صبح آندھرا پردیش کے گنٹور میں واقع ان کی رہائش گاہ پر دل کا دورہ پڑنے سے انتقال ہوگیا۔ وہ 74 برس کے تھے۔ وہ تلگو فلموں میں ویلن اور مزاحیہ کرداروں کے لئے مشہور تھے۔ اداکار کے انتقال سے پوری جنوبی فلم انڈسٹری میں سوگ کی لہر دوڑ گئی ہے۔

جے پرکاش ریڈی کے کنبے والوں نے بتایا کہ اداکار کو غسل خانے میں دل کا دورہ پڑا اور وہ گر پڑے اور حرکت قلب رک جانے سے ان کی موت ہوگئی۔ تلگو دیشم پارٹی کے سربراہ اور آندھرا پردیش کے سابق وزیراعلی این چندر بابو نائیڈو نے اداکار کے انتقال پر تعزیت کا اظہار کیا ہے۔

چندرابابو نائیڈو نے ٹوئٹ میں کہا کہ ’’جے پرکاش ریڈی گرو کے انتقال سے تلگو سنیما اور تھیٹر نے اپنا ایک ہیرا کھو دیا ہے۔ کئی عشروں تک الگ الگ کرداروں نے ہمیں کئی یادیں دی ہیں۔ اس دکھ کی گھڑی میں ان کی فیملی اور دوستوں کے لئے میرا دل دکھ سے بھر گیا ہے۔‘‘ واضح رہے کہ جے پرکاش ریڈی نے چھترپتی، گبر سنگھ، پریمنچو کندام را، جیم مندیرا، نائک، ریسو گورم، سمر سمہا ریڈی، چینا کیشو ریڈی، سیتیا، منم، ٹیمپر سمیت کئی سپر ہٹ فلموں میں کام کیا ہے۔