حیدرآباد: اُردو یونیورسٹی کے ریگولر کورسز میں آن لائن داخلوں کے لئے اعلامیہ جاری

یونیورسٹی میں گزشتہ سال ہیڈ کوارٹر میں بیچلر آف ووکیشنل کورسز کے تحت میڈیکل امیجنگ ٹیکنالوجی اور میڈیکل لیبارٹری ٹیکنالوجی کے دو نئے کورسز متعارف کیے گئے تھے جن میں داخلہ میرٹ کی بنیاد پر دیا جارہا ہے

تصویر سوشل میڈیا
تصویر سوشل میڈیا
user

یو این آئی

حیدرآباد: مولانا آزاد نیشنل اردو یونیورسٹی نے تعلیمی سال 2020-21 کے لیے مرکزی کیمپس حیدرآباد اور دیگر سٹیلائٹ کیمپسوں لکھنؤ و سری نگر کے علاوہ مختلف ریاستوں میں موجود کالجس آف ٹیچر ایجوکیشن (سی ٹی ایز) اور پالی ٹیکنیکس کے لیے ریگولر کورسز میں آن لائن داخلوں کااعلان کردیا ہے۔

اردو میڈیم میں اعلی تعلیم فراہم کرنے والی ملک کی یہ واحد جامعہ ہے، یونیورسٹی میں گزشتہ سال ہیڈ کوارٹر میں بیچلر آف ووکیشنل کورسز کے تحت میڈیکل امیجنگ ٹیکنالوجی اور میڈیکل لیبارٹری ٹیکنالوجی کے دو نئے کورسز متعارف کیے گئے تھے جن میں داخلہ میرٹ کی بنیاد پر دیا جارہا ہے۔ انٹرنس کے ذریعہ داخلہ دیئے جانے والے کورسز میں پی ایچ ڈی اردو، انگریزی، ہندی، عربی، فارسی، مطالعات ترجمہ، مطالعات نسواں، نظم و نسق عامہ، سیاسیات، سوشل ورک، اسلامک اسٹڈیز، تاریخ، معاشیات، سماجیات، تعلیم، صحافت و ترسیل عامہ، مینجمنٹ، کامرس، ریاضی، طبیعات، کیمیا، نباتیات، حیوانیات، کمپیوٹر سائنس، ایس ای آئی پی شامل ہیں۔

ان کے علاوہ دیگر انٹرنس کی اساس کے کورسز میں پوسٹ گریجویٹ پروگرامس میں ایم بی اے، ایم سی اے، ایم ٹیک (کمپیوٹرسائنس) اور ایم ایڈ، انڈر گریجویٹ پروگرامس (بی ایڈ اور بی ٹیک (کمپیوٹر سائنس) اور پیشہ ورانہ ڈپلوما (ایلمنٹری ایجوکیشن (ڈی ایل ایڈ) و نیز پالی ٹیکنک کورسز سیول انجینئرنگ، کمپیوٹر سائنس انجینئرنگ، الیکٹرانکس اینڈ کمیونی کیشن انجینئرنگ اور انفارمیشن ٹیکنالوجی، میکانیکل، الیکٹریکل و الیکٹرانکس انجینئرنگ شامل ہیں۔ ا نٹرس کے کورسز میں آن لائن درخواست داخل کرنے کی آخری تاریخ 10 جون ہے۔

تمام کورسز کا ذریعہ تعلیم اور امتحان صرف اردو ہے۔ پروفیسر ایس ایم رحمت اللہ رجسٹرار انچارج کے جاری کردہ اعلامیہ کے بموجب ایسے کورسز جن میں داخلہ میرٹ کی اساس پر دیا جارہا ہے ان کی آخری تاریخ 10 اگست مقرر ہے۔ اس میں پوسٹ گریجویٹ پروگرام (اردو، انگریزی، ہندی، عربی، مطالعات ترجمہ، فارسی؛ مطالعات نسواں، نظم و نسق عامہ، سیاسیات، سوشل ورک، اسلامک اسٹڈیز، تاریخ، معاشیات، سماجیات، صحافت و ترسیل عامہ،ایم کام اور ایم ایس سی، ریاضی)، انڈر گریجویٹ پروگرامس میں بی اے، بی اے (آنرس) - جے ایم سی، بی کام، بی ایس سی (ریاضی، طبیعات، کیمیا۔ ایم پی سی)، بی ایس سی(ریاضی، طبیعات، کمپیوٹر سائنس، ایم پی سی ایس) اور بی ایس سی (حیاتی علوم – زیڈ بی سی)، بیچلر آف ووکیشنل کورسز کے تحت میڈیکل امیجنگ ٹیکنالوجی (ایم آئی ٹی) اور میڈیکل لیبارٹری ٹیکنالوجی (ایم ایل ٹی)، مدارس کے فارغ طلبہ کے لیے برائے داخلہ انڈر گریجویٹ (بی کام/ بی ایس سی) اور پالی ٹیکنک پروگرامس کے لیے برج (رابطہ) کورسز شامل ہیں۔

علاوہ ازیں لیٹرل انٹری کے تحت بی ٹیک اور پالی ٹیکنیک میں اہل طلبہ کو راست داخلے دیئے جائیں گے۔ پی جی ڈپلوما ان ریٹیل مینجمنٹ اور جزوقتی ڈپلوما پروگراموں میں اردو، ہندی، عربی، فارسی اور اسلامک اسٹڈیز، تحسین غزل و اردو میں سرٹیفکیٹ کورس بھی دستیاب ہیں۔ لکھنؤ کیمپس میں اردو، فارسی، انگریزی اور عربی کے بی اے، ایم اے اور پی ایچ ڈی پروگرام دستیاب ہیں۔

سری نگر کیمپس میں معاشیات، اسلامک اسٹڈیز، اردو اور انگریزی کا ایم اے اور اردو، انگریزی اور اسلامک اسٹڈیز کا پی ایچ ڈی پروگرام؛ کالجس آف ٹیچر ایجوکیشن بھوپال(مدھیہ پردیش)، دربھنگہ(بہار) میں بی ایڈ، ایم ایڈ اور پی ایچ ڈی ان ایجوکیشن، کالجس آف ٹیچر ایجوکیشن آسنسول(مغربی بنگال)، اورنگ آباد (مہاراشٹرا)، سنبھل (اترپردیش)، نوح (ہریانہ) اور بیدر (کرناٹک) میں بی ایڈ دستیاب ہے۔ پالی ٹیکنیک کورسز میں سیول انجینئرنگ؛ کمپیوٹر سائنس انجینئرنگ، الیکٹرانکس اینڈ کمیونی کیشن انجینئرنگ کے ڈپلوما دربھنگہ۔بہار اور بنگلورو۔ کرناٹک میں دستیاب ہیں۔ جبکہ سیول انجینئرنگ، میکانیکل انجینئرنگ، الیکٹریکل اور الیکٹرانکس انجینئرنگ، کڑپہ۔آندھراپردیش اور کٹک۔اڈیشہ میں دستیاب رہیں گے۔ تمام درخواست گزاروں کے لیے لازمی ہے کہ وہ کم از کم دسویں /بارہویں میں اردو میڈیم سے تعلیم حاصل کرچکے ہوں یا بحیثیت زبان یا مضمون، اردو کامیاب ہوں یا مصرحہ مدرسوں سے فارغ ہوں جن کا ذریعہ تعلیم اردو ہو۔ تمام پروگراموں کا ذریعہ تعلیم اردو ہے۔ تمام پروگراموں میں داخلے مولانا آزاد نیشنل اردو یونیورسٹی حیدرآباد کیمپس میں بھی دستیاب ہیں۔ درخواستیں یونیورسٹی ویب سائٹ manuu.edu.in پر صرف آن لائن ہی قبول کی جائیں گی۔ تفصیلات یا کسی وضاحت کے لیے نظامت داخلہ کو admissionsregular@manuu.edu.in پر ای میل کریں۔ ایس سی /ایس ٹی/اوبی سی/معذور امیدواروں کے مختلف پروگراموں میں داخلے کیلئے تحفظات حکومت ہند کے ضوابط کے مطابق رہیں گے۔ یونیورسٹی میں ہاسٹل کی محدود گنجائش فراہم ہے۔

next