آخر کیا ہے ’49204084041‘ جسے سہواگ نے کہا بھول جانے والا ’او ٹی پی‘؟

ہندوستانی ٹیم کے سابق جارحانہ سلامی بلے باز وریندر سہواگ سوشل میڈیا پر اپنے بہترین تبصروں کے لیے مشہور ہیں۔ آج انھوں نے ایک انتہائی دلچسپ ٹوئٹ کیا ہے جس میں لکھا ہے ’’بھول جانے والا او ٹی پی ہے 49204084041‘‘۔ یہ مختصر سا ٹوئٹ انتہائی معنی خیز ہے کیونکہ یہ دراصل ہندوستانی بلے بازوں کے ذریعہ آسٹریلیا کے خلاف دوسری اننگ میں بنائے گئے اسکور ہیں۔

آج ایڈیلیڈ میں ہندوستان کو آسٹریلیا کے ہاتھوں شرمناک شکست کا سامنا کرنا پڑا ہے۔ دوسری اننگ میں پوری ہندوستانی ٹیم محض 36 رن بنا کر آؤٹ ہو گئی۔ محمد شامی چوٹ لگنے کی وجہ سے ریٹائرڈ ہرٹ ہو گئے، اگر ایسا نہیں ہوتا تو ممکن ہے 4-2 رن مزید بن جاتے۔ لیکن اس شکست کے بعد ہندوستانی ٹیم کی زبردست تنقید ہو رہی ہے۔ وریندر سہواگ نے ہندوستانی ٹیم کے بارے میں کوئی تذکرہ تو نہیں کیا ہے، لیکن بلے باز نمبر 1 سے لے کر بلے باز نمبر 11 تک ترتیب وار جو رن بنائے گئے تھے، اس کو دیتے ہوئے کہا ہے کہ اس او ٹی پی کو بھول جانا ہی بہتر ہے۔

چونکہ وریندر سہواگ سوشل میڈیا پر اپنے طنزیہ تبصروں کے لیے کافی مشہور ہیں، اس لیے ان کا تازہ ٹوئٹ ہندوستانی بلے بازی پر ایک طنز تصور کیا جا رہا ہے۔ یہاں قابل ذکر بات یہ بھی ہے کہ ہندوستانی ٹیم کا کوئی بھی بلے باز دوہرے ہندسے میں نہیں پہنچ سکا ہے اور سب سے زیادہ رن بنانے والے بلے باز مینک اگروال رہے جنھوں نے 9 رن بنائے۔ 9 کھلاڑی تو ایسے رہے جنھوں نے 5 رن سے بھی کم بنائے۔