ہم ایسی ٹیم بنیں گے کہ پاکستان میں کھیلنے کے لیے قطار لگا کر سبھی آنا چاہیں گے: رمیز راجہ

راولپنڈی: سیکورٹی وجوہات کے سبب نیوزی لینڈ کے پاکستان کا دورہ منسوخ کرنے کے ایک دن بعد، پاکستان کرکٹ بورڈ (پی سی بی) کے چیئرمین رمیز راجہ نے سبھی کو اس سے باہر نکل کر آگے کے بارے میں سوچنے کے لئے کہا ہے۔ نیوزی لینڈ کی ٹیم جمعہ کو میچ شروع ہونے سے قبل پاکستان میں موجود تھی اور تین میچوں کی ون ڈے سیریز کے علاوہ پانچ میچوں کی ٹی- 20 انٹرنیشنل سیریز کی تیاری کر رہی تھی۔ نیوزی لینڈ نے میچ شروع ہونے سے چند منٹ قبل دورے کی منسوخی کا اعلان کرکے سب کو حیران کر دیا۔

کریک انفو کو اطلاع ملی ہے کہ ایک وقت میں پاکستان کرکٹ بورڈ ذہن بنا چکا تھا کہ باضابطہ طور پر نیوزی لینڈ کے اس فیصلے کی مخالفت کرنی ہے، لیکن پھر بعد میں یہ فیصلہ کیا کہ ان کے پاس ایسا کرنے کی کوئی ٹھوس بنیاد نہیں ہے۔ نیوزی لینڈ کرکٹ بورڈ نے یہ فیصلہ ان کی حکومت اور سیکورٹی ایجنسی سے ملی اطلاعات کے بعد کیا تھا۔

رمیز راجہ کی جانب سے پاکستانی کرکٹ شائقین کے لیے ایک ویڈیو پیغام جاری کیا گیا۔ جس میں انہوں نے کہا کہ ’’جو کچھ بھی ہوا وہ پاکستان کرکٹ کے لیے بالکل بھی اچھا نہیں ہے۔ لیکن ایک چیز جو ہمیں مضبوط بناتی ہے وہ یہ ہے کہ اس طرح کے حالات ماضی میں بھی ہمارے سامنے آئے تھے اور پھر ہم نے ان پر قابو پاتے ہوئے آگے کی جانب دیکھا‘‘۔

راجہ نے کہا ’’میں اپنے تمام کرکٹ شائقین سے درخواست کرتا ہوں کہ آپ اس مشکل صورتحال میں بھی ہمارے ساتھ رہیں، آپ کا تعاون ہمیں ورلڈ کپ میں طاقت دے گا۔ میں اپنے کھلاڑیوں سے کہنا چاہتا ہوں کہ آپ اپنا غصہ میدان میں نکالیں اور یہی ہمارے درد کی دوا ہوگی۔ اگر آپ دنیا کی بہترین ٹیم بن جائیں گے تو ہر کوئی آپ کے ملک میں آنے اور کھیلنے کے لیے قطار میں کھڑا ہوگا۔ میں امید کروں گا کہ سبھی لوگ اس سے سبق لیں گے اور آگے کی جانب دیکھیں، مایوس نہ ہوں‘‘۔

اس وقت جو پاکستان کرکٹ کے حالات ہیں وہ یہ ہیں کہ پی سی بی کو اس بات کا خوف نہیں کہ اب ہر ملک ان کے یہاں آکر کھیلنے سے پرہیز کرسکتا ہے۔ پاکستان کرکٹ بورڈ کو مالی طور پر بڑا نقصان کا خدشہ پریشان کر رہا ہے اور ساتھ ہی ورلڈ کپ سے قبل ان کی تیاریوں کو بھی دھچکا لگا ہے۔ پاکستان نے ٹی ٹوئنٹی ورلڈ کپ سے قبل ویسٹ انڈیز، نیوزی لینڈ اور انگلینڈ کے خلاف کھیلنے کے لیے کل 12 ٹی- 20 انٹرنیشنل کھیلنا تھے۔ لیکن کیریبیائی سرزمین پر ان تیاریوں پر پہلے بارش نے پانی پھیرا اور اب نیوزی لینڈ نے دورہ منسوخ کرکے ایک اور دھچکا دیا ہے۔ یہی نہیں، انگلش کرکٹ بورڈ (ای سی بی) بھی دورہ پاکستان پر نظر ثانی کر رہا ہے اور جلد ہی کوئی فیصلہ لینے والا ہے۔

رمیز راجہ نے مزید کہا کہ ’’ہم جانتے ہیں کہ ان حالات پر کیسے قابو پانا ہے اور بہت جلد اس صورتحال سے باہر نکل آئیں گے۔ ہمیں خود پر اور اپنی گھریلو کرکٹ پر یقین ہے اور ابھی بھی ہم ایک عظیم ٹیم بن کر ابھر سکتے ہیں‘‘۔ انہوں نے کہا ’’میں سمجھ سکتا ہوں کہ اس وقت پاکستانی ٹیم پر بہت زیادہ دباؤ ہے، لیکن اس سے کوئی فرق نہیں پڑتا۔ ہم اس کا مضبوطی سے سامنا کریں گے اور جلد ہی ہم آپ کے سامنے ایک اچھی خبر لائیں گے۔ ہم اپنے مداحوں سے امید کرتے ہیں کہ وہ ان حالات میں بھی ہمارے ساتھ کھڑے رہیں ۔ یہ وقت سخت محنت کرنے کا اور دنیا کی بہترین ٹیم بنے کا ہے تاکہ ہم ان چیلنجوں پر آسانی سے قابو پا سکیں۔