کئی معنوں میں تاریخی ثابت ہوا ’اینڈرسن-تندولکر ٹرافی‘، کچھ بڑے ریکارڈس قائم کر ہندوستانی کھلاڑی ہوئے سرخرو

لندن کے اوول میدان پر کھیلے گئے ’اینڈرسن-تندولکر ٹرافی‘ کے پانچویں مقابلہ میں ہندوستانی ٹیم نے نہ صرف انگلینڈ کو شکست دی بلکہ کئی تاریخی ریکارڈ بھی اپنے نام کر لیے۔ ٹیسٹ کرکٹ کا یہ مقابلہ کرکٹ کے مداحوں کے لیے تفریح کے ساتھ ساتھ ریکارڈس کے اعتبار سے بھی شاندار رہا۔ ایسا پہلی بار ہوا ہے جب ہندوستان نے غیر ملکی سرزمین پر کسی ٹیسٹ سیریز کا پانچواں میچ جیتا ہے۔ ساتھ ہی انگلینڈ نے ہندوستان کے خلاف 2018 کے بعد کوئی ٹیسٹ سیریز نہیں جیتی، 2018 کے بعد ہندوستان نے 2 ٹیسٹ سیریز میں جیت حاصل کی اور 2 ڈرا ہوئے۔

ہندوستان-انگلینڈ کے درمیان اختتام پذیر 5 ٹیسٹ میچوں کی سیریز میں مجموعی طور پر 7187 رن بنے، جو کسی بھی دو فریقی سیریز میں دوسرا سب سے زیادہ رنوں کا مجموعہ ہے۔ ٹیم انڈیا کی جانب سے 5 اور انگلینڈ کی جانب سے 4 بلے بازوں نے اس سیریز میں 400 یا اس سے زائد رن اسکور کیے ہیں۔ جبکہ سیریز میں مشترکہ طور پر 50 نصف سنچری اور 21 سنچری لگے ہیں جو کہ ایک مشترکہ ریکارڈ ہے۔ ساتھ ہی 19 بار سنچری پارٹنرشب بھی ہوئیں جو ٹیسٹ کرکٹ میں مشترکہ طور پر سب سے بڑی تعداد ہے۔

بلے بازی کے علاوہ گیند بازی میں بھی ہندوستان نے کمال کا مظاہرہ کیا ہے۔ محمد سراج نے جسپریت بمراہ کے ذریعہ انگلینڈ میں ایک سیریز میں ہندوستان کے لیے سب سے زیادہ وکٹیں (23) لینے کے ریکارڈ کو دہرایا۔ ساتھ ہی محمد سراج نے اوول ٹیسٹ میں 9 وکٹ حاصل کر ہندوستان کی جیت میں اہم کردار ادا کیا، اس بہترین کارکردگی کے لیے انہیں مین آف دی میچ کے ایوارڈ سے نوازا گیا۔

’اینڈرسن-تندولکر ٹرافی‘ 2025 میں رن اور بلے بازی سے متعلق کچھ ریکارڈس:

• کسی سیریز میں بنایا گیا دوسرا سب سے زیادہ رن (7187)

• ایک سیریز میں مشترکہ سب سے زیادہ 300 سے زائد ٹیم کا مجموعہ (14)

• ایک سیریز میں 400 سے زیادہ رنز بنانے والے سب سے زیادہ بلے باز (9)

• مشترکہ سب سے زیادہ انفرادی 50 پلس سکور (50)

• مشترکہ سب سے زیادہ انفرادی سنچریوں کے اسکور (21)

• مشترکہ سب سے زیادہ 100 رن کی شراکتیں (19)

انگلینڈ میں ٹیسٹ سیریز میں سب سے زیادہ وکٹ لینے والے ہندوستانی گیندباز:

• 23 - جسپریت بمراہ، 22-2021

• 23 - محمد سراج، 2025

• 19 - بھونیشور کمار، 2014

کم رن سے شکست کے معاملہ میں انگلینڈ کا ریکارڈ:

• 1 بمقابلہ نیوزی لینڈ، ویلنگٹن، 2023

• 3 بمقابلہ آسٹریلیا، مانچسٹر، 1902

• 6 بمقابلہ آسٹریلیا، سڈنی، 1885

• 6 بمقابلہ انڈیا، اوول، 2025

سب سے کم فرق سے ہندوستان کی جیت (رن کے اعتبار سے)

• 6 بمقابلہ انگلینڈ، اوول، 2025

• 13 بمقابلہ آسٹریلیا، وانکھیڑے، 2004

• 28 بمقابلہ انگلینڈ، کولکاتہ، 1972

• 31 بمقابلہ آسٹریلیا ایڈیلیڈ، 2018