سری لنکا کے خلاف آج سیریز پر قبضہ کرنے اترے گی ٹیم انڈیا

کولمبو: پہلا ون ڈے آسانی سے جیتنے والی ہندوستانی کرکٹ ٹیم منگل کو دوسرے ون ڈے میں سری لنکا کے خلاف سیریز جیتنے کے ارادے سے اترے گی، ہندوستان نے پہلے ون ڈے میں شاندار کارکردگی کرتے ہوئے 13.2 اوورز باقی رہتے سات وکٹوں سے جیت حاصل کرلی تھی۔ سری لنکا نے 50 اوور میں نو وکٹوں کے نقصان پر 262 رن بنائے، جبکہ ہندوستان نے 36.4 اوور میں تین وکٹوں پر 263 رنز بناکر یکطرفہ کامیابی حاصل کی۔ اب ٹیم انڈیا کا ہدف اپنی شاندار کارکردگی کو برقرار رکھنا ہے اور آج ہونے والے دوسرے ون ڈے میں سیریز پر قبضہ کرنا ہوگا۔

ہندوستانی کپتان شیکھر دھون نے 86 رنز کی زبردست اننگز کھیل کر ٹیم انڈیا کو جیت کی دہلیز پر پہنچایا۔ نوجوان اوپنر پرتھوی شاہ نے 43 رن کی جارحانہ اننگز کھیل کر ہندوستان کو ٹھوس آغاز دیا اور وہ اپنی شاندار اننگز کے لئے پلیئر آف دی میچ بنے۔ پرتھوی کے علاوہ ایشان کشن اور سوریا کمار یادو نے بھی شاندار اننگز کھیل کر ہندوستان کو آسان جیت کی منزل پر پہنچایا۔

ہندوستان کی طرف سے گیندبازی میں بھی اس کے دونوں اہم اسپنرز یوزویندر چہل اور کلدیپ یادو اور بائیں ہاتھ کے اسپنر کرنال پانڈیا نے عمدہ بولنگ کی اور سری لنکا کے بلے بازوں کو غلبہ حاصل کرنے کا موقع نہیں دیا۔ ہندوستان کی تشویش یہ تھی کہ ان کے تیزگیندباز اور نائب کپتان بھونیشور کمار نو اوورز میں 63 رن پر کوئی وکٹ حاصل نہیں کر سکے۔

دوسری جانب سری لنکا کو سیریز میں برقرار رہنے کے لئے دوسرا میچ جیتنا ہوگا۔ پہلے میچ میں سری لنکا کی گیندبازی کمزور ثابت ہوئی، جس کا فائدہ اٹھاتے ہوئے ہندوستانی بلے بازوں نے جم کر رن جمع کیے۔ سری لنکا نے اپنی گزشتہ تینوں سیریز گنوائی ہے۔ انگلینڈ کے خلاف سیریز صفر۔ دو سے گنوانے میں بھی سری لنکا کی گیندبازی کمزور رہی تھی۔ سری لنکا کو اپنی گیندبازی بہتر کرنی ہوگی، تبھی جاکر وہ سیریز میں برابری حاصل کرسکے گی۔