راہل دراوڑ ہندوستانی ٹیم کے ساتھ بطور ہیڈ کوچ سری لنکا کے دورے پر جائیں گے

نئی دہلی: نیشنل کرکٹ اکیڈمی (این سی اے) کے سربراہ اور سابق ہندوستانی کپتان راہل دراوڑ جولائی میں سری لنکا کے دورے پر انڈیا اے ٹیم کے ساتھ بطور ہیڈ کوچ جائیں گے، ٹیم کے کوچنگ اسٹاف میں بھی ان کے این سی اے کے ساتھی ممبر بھی شامل ہوں گے، سمجھا جاتا ہے کہ سری لنکا کے دورے پر جانے والی ہندوستانی ٹیم کو 13 جولائی کو پہلے ون ڈے سے پہلے کم سے کم ایک ہفتہ کا وقت دیا جائے گا۔ بی سی سی آئی نے ابتدا میں بنگلورو میں تربیتی کیمپ کی میزبانی کرنے کا سوچا تھا، لیکن کورونا وائرس اور بدستور لاک ڈاؤن کی وجہ سے خراب ہوتی صورتحال نے اس امکان کو ختم کر دیا۔

اطلاعات کے مطابق ہندوستانی ٹیم دورے کے لئے روانہ ہونے سے پہلے کوارنٹائن میں رہے گی اور اسے ضرورت پڑنے پر سری لنکا پہنچنے پر بھی آئیسولیشن سے گزرنا پڑسکتا ہے جو سری لنکا میں بایو پروٹوکول پر منحصر کرتا ہے۔ دریں اثنا، منگل تک، سری لنکا کی وزارت صحت کی رہنما خطوط میں کہا گیا ہے کہ ہندوستان، ویتنام، جنوبی افریقی اور جنوبی امریکہ کے ممالک کے ان لوگوں کو صرف ایک ہی دن کی کوارنٹائن میں رہنا ہوگا جنہوں کورونا ویکسین کی دونوں ڈوز لے لی ہیں۔ یہ ضابطہ 30 جون تک نافذ ہے۔ حکم نامے میں یہ بھی کہا گیا ہے کہ رہنما خطوط 30 جون کے بعد تبدیل ہوسکتے ہیں اور جب تک ہندوستانی ٹیم سری لنکا روانہ نہیں ہوگی اس وقت تک مختلف قواعد لاگو ہوسکتے ہیں۔ مختلف قواعد ان لوگوں کے لئے بھی لاگو ہوسکتے ہیں جنہوں نے ویکسین کی ایک ہی ڈوز لگوائی ہے۔

ہندوستانی ٹیم کے تمام ممبران کو روانگی سے قبل کورونا ٹیسٹ کی نگیٹیو رپورٹ اپنے ساتھ لے کر رکھنی ہوگی اور سری لنکا پہنچنے پر اسے دکھانا ہوگا۔ اس کے بعد، ہوٹل میں ایک دن کے کوارنٹائن کے بعد انہیں پھر سے نگیٹیو آنا ہوگا۔ سری لنکا کے دورے کے پیش نظر، بی سی سی آئی نے پہلے ہی کھلاڑیوں کو ویکسین لگوانے کا مشورہ دیا تھا، لیکن ٹیم کے کتنے ممبران روانگی سے قبل دونوں ڈوز لینے میں کامیاب رہتے ہیں، یہ دیکھنا دلچسپ ہوگا۔ اسی کے ساتھ ساتھ، سلیکشن کمیٹی کی میٹنگ کی تاریخ کے بارے میں کوئی معلومات نہیں ہے، حالانکہ یہ جلد ہونے کی امید ہے۔ یہ سمجھا جا رہا ہے کہ شکھر دھون کو کپتانی سونپی جاسکتی ہے، جبکہ شریس ایر کی دستیابی ابھی تک یقینی نہیں ہے۔