آئی پی ایل 2026: بنگلورو بمقابلہ حیدرآباد، پہلے میچ کے لیے پولیس نے جاری کی ٹریفک ایڈوائزری

آئی پی ایل 2026 کا پہلا مقابلہ ہفتہ (28 مارچ) کو رائل چیلنجرس بنگلورو (آر سی بی) اور سن رائزرس حیدرآباد (ایس آر ایچ) کے درمیان بنگلورو کے ایم چنا سوامی اسٹیڈیم میں کھیلا جائے گا۔ اس کے بعد اس میدان پر اگلا میچ 5 اپریل کو آر سی بی اور چنئی سپر کنگس (سی ایس کے) کے درمیان ہوگا۔ دونوں مقابلوں کے لیے بنگلورو ٹریفک پولیس کی جانب سے ایڈوائزری جاری کر دی گئی ہے۔

واضح رہے کہ آئی پی ایل کے پہلے مرحلے کا شیڈول جاری ہونے کے کچھ دن بعد یہ طے ہوا کہ بنگلورو میں آئی پی ایل کے مقابلے ہوں گے۔ گزشتہ سیزن (آئی پی ایل 2025) میں آر سی بی کی جیت کے بعد نکالی گئی ’وکٹری پریڈ‘ کے دوران اسٹیڈیم کے باہر ہوئی بھگدڑ میں 11 لوگوں کی جان چلی گئی تھی، جبکہ متعدد زخمی ہوئے تھے۔ اس واقعے کے پیش نظر اسٹیڈیم میں ہونے والے میچوں کے لیے اس بار خاص سختی کی جا رہی ہے۔

ہجوم کے پیش نظر اسٹیڈیم کے آس پاس پارکنگ کی اجازت نہیں دی گئی ہے۔ ان میں بالیکندری سرکل اور سی ٹی او جنکشن کے درمیان کوئنس روڈ، انل کمبلے سرکل سے کوئنس سرکل تک ایم جی روڈ، اور ایم جی روڈ کو کبن روڈ سے جوڑنے والی لنک روڈ شامل ہیں۔ اس کے علاوہ کبن روڈ، سینٹ مارک روڈ، میوزیم روڈ، کستوربا روڈ، سنٹرل اسٹریٹ، لاویل روڈ اور وٹل مالیا روڈ پر بھی پارکنگ کی اجازت نہیں ہے۔ کبن پارک کے اندرونی راستے جیسے کنگ روڈ، پریس کلب ایریا اور فاؤنٹین روڈ بھی نو پارکنگ زون میں شامل ہوں گے۔ افسران کے مطابق ان ایریا میں پارک کی گئی گاڑیوں پر جرمانہ عائد کیا جا سکتا ہے اور انہیں ’ٹو‘ کر کے اٹھایا بھی جا سکتا ہے۔

میچ کے دن گاڑیوں کی پارکنگ کے لیے کئی انتظامات کیے گئے ہیں۔ بھیڑ کم کرنے کے لیے پولیس نے پارکنگ کے لیے مخصوص جگہوں کا بندوبست کیا ہے۔ ان میں سدھ لنگیا سرکل پر واقع سینٹ جوزف انڈین ہائی اسکول گراؤنڈ اور میوزیم روڈ پر واقع سینٹ جوزف یورپین اسکول گراؤنڈ شامل ہیں۔ اس کے علاوہ پارکنگ کے دیگر متبادل میں فریڈم پارک ایم ایل سی پی، گڑوڈا مال، یو بی سٹی اور شیواجی نگر ٹی ٹی ایم سی کی پہلی منزل شامل ہیں۔ افسران نے شائقین سے اسٹیڈیم کے قریب ٹریفک کا دباؤ کم کرنے کے لیے ان سہولیات کا استعمال کرنے کی اپیل کی ہے۔

ہجوم کی آمد و رفت کے لیے کئی انٹری اور ایگزٹ راستے بنائے گئے ہیں۔ کبن روڈ کی جانب سے گیٹ ای-1 سے ای-3، ای-18، ای-19، ای-22، ای-23، لنک روڈ کی جانب سے ای-11 سے ای-17 اور کوئنس روڈ پر ای-05 اور ای-08 کے ذریعہ انٹری کی اجازت ہے۔ جبکہ ایگزٹ کے لیے ای-09 اور ای-9اے دروازے کا استعمال کیا جائے گا۔ گیٹ ای-10 کھلاڑیوں، افسران اور وی آئی پی کے لیے ریزرو ہے۔

کیب اور آٹو کا استعمال کرنے والے مسافروں کے لیے پک اپ پوائنٹ بی آر وی گراؤنڈ اور مانک شاہ پریڈ گراؤنڈ پر بنائے گئے ہیں، جبکہ ڈراپ پوائنٹ گیٹ نمبر 6 اور گیٹ نمبر 3 کے پاس ہے۔ پولیس نے لوگوں سے اپیل کی ہے کہ وہ اسٹیڈیم کے آس پاس ٹریفک کے دباؤ اور لوگوں کی آمد و رفت کو آسان بنانے کے لیے بی ایم ٹی سی  بسوں اور میٹرو سروسز کا استعمال کریں۔