تیز گیندباز محمد شامی آسٹریلیا جانے کو بے قرار! سید مشتاق علی ٹرافی میں گیندبازی کے ساتھ بلے بازی میں بھی دکھایا دم

آسٹریلیا میں جہاں ہندوستانی ٹیم کو دوسرے ٹیسٹ میں شرمناک شکست کا سامنا کرنا پڑا ہے، وہیں دوسری طرف ہندوستان کے مایہ ناز تیز گیندباز محمد شامی ٹیم میں واپسی کے لیے جی توڑ محنت کر رہے ہیں۔ گزشتہ دنوں خبر آئی تھی کہ انھیں بارڈر-گواسکر ٹرافی کے آخری دو میچوں کے لیے آسٹریلیا بھیجا جا سکتا ہے اور صرف این سی اے سے فٹ نس سرٹیفکیٹ ملنا باقی ہے۔ اب محمد شامی نے اپنی فٹ نس کا بہترین ثبوت سید مشتاق علی ٹرافی میں دیا ہے۔ انھوں نے نہ صرف شاندار گیندبازی کی، بلکہ طوفانی بلے بازی کے ذریعہ اپنی ٹیم کو فتحیاب کرایا۔

دراصل محمد شامی نے سید مشتاق علی ٹرافی میں بنگال کے لیے کھیلتے ہوئے چنڈی گڑھ کے خلاف پری کوارٹر فائنل میں بہترین کارکردگی کا مظاہرہ کیا ہے۔ ایسا لگتا ہے وہ آسٹریلیا جانے کے لیے بے قرار ہیں، اور اسی لیے وہ گیندبازی کے ساتھ ساتھ بلے بازی میں بھی اپنا پورا دم دکھا رہے ہیں۔ انھوں نے اس میچ میں 17 گیندوں کا سامنا کرتے ہوئے طوفانی انداز میں ناٹ آؤٹ 32 رن بنائے اور ایک وکٹ بھی حاصل کیا۔

بنگلورو کے چناسوامی اسٹیڈیم میں کھیلے گئے اس میچ میں محمد شامی نے ایک اہم موقع پر یہ رن بنائے۔ پہلے بلے بازی کرتے ہوئے بنگال کی ٹیم نے 114 رن پر ہی 8 وکٹ گنوا دیے تھے۔ ایسے میں بنگال کی ٹیم مشکل میں پھنسی ہوئی تھی، اور پھر محمد شامی نے وکٹ پر اترتے ہی تیزی کے ساتھ رن بنانا شروع کر دیا۔ ٹی-20 فارمیٹ والے اس میچ میں شامی نے 2 چھکوں اور 3 چوکوں کی مدد سے 17 گیندوں پر ناٹ آؤٹ 32 رن بنائے۔ شامی کی اس اننگ کی بدولت بنگال 20 اوور میں 9 وکٹ کے نقصان پر 159 رن بنانے میں کامیاب ہو گئی۔

بلے بازی کے بعد محمد شامی نے گیندبازی بھی بہترین کی۔ انھوں نے 4 اوور میں محض 25 رن دے کر سلامی بلے باز ارسلان خان کو آؤٹ کیا۔ یہ وکٹ انھوں نے اپنے پہلے ہی اوور کی تیسری گیند پر حاصل کر لیا تھا۔ سیان گھوش نے ان کا بھرپور ساتھ دیا جنھوں نے 4 اوورس میں 30 رن دے کر 4 کھلاڑیوں کو آؤٹ کیا۔ کنشک گھوش (4 اوورس میں 35 رن) نے 2 کھلاڑیوں کو اور شہباز احمد (4 اوورس میں 25 رن) نے ایک کھلاڑی کو پویلین بھیجا۔ چنڈی گڑھ کی ٹیم 20 اوورس میں 9 وکٹ کے نقصان پر 156 رن ہی بنا سکی، اور اس طرح بنگال نے 3 رن سے جیت حاصل کر لی۔

محمد شامی کی اس کارکردگی سے امیدیں کافی بڑھ گئی ہیں اور کبھی بھی انھیں فٹ نس سرٹیفکیٹ مل سکتا ہے۔ ہندوستانی ٹیم آسٹریلیا کے خلاف اپنا تیسرا ٹیسٹ میچ 14 دسمبر سے برسبین میں کھیلے گی۔ چونکہ اس میں زیادہ وقت نہیں بچا ہے، اس لیے محمد شامی چوتھے ٹیسٹ میچ سے ہی ہندوستانی ٹیم کا حصہ بن پائیں گے، جو کہ 26 دسمبر سے ملبورن میں کھیلا جائے گا۔