سلمان خان کی ’رادھے‘ نے قائم کیے کئی ریکارڈ، 4.2 ملین ویوز کے ساتھ سب سے زیادہ دیکھی جانے والی فلم

ممبئی: لاک ڈاؤں کے باوجود سلمان خان کی عید پر ریلیز ہونے والی فلم ’رادھے‘ بہترین کمائی کر رہی ہے۔ ہندوستان میں فلم رادھے کو زی 5 کی پے پر ویو سروس زی پلیکس اور اہم ڈی ٹی ایچ آپریٹر کے ساتھ ریلیز کیا گیا ہے۔ جبکہ گزشتہ دنوں بین الاقوامی تھیٹرز میں بھی اسے ریلیز کیا گیا، جہاں لوگوں نے اس فلم کو کافی سراہا ہے۔ یہی وجہ ہے کہ یہ فلم ریلیز کے دن ہی سب سے زیادہ دیکھی جانے والی فلم بن گئی۔ اتنا ہی نہیں بہت زیادہ تعداد میں لوگوں کے لاگ ان کیے جانے کے سبب سرور بھی ڈاؤن ہو گیا۔ کل ملاکر یہ فلم عید کے موقع پر بلاک بستر ثابت ہوئی ہے۔

فلمی نقاد کمال آر خان نے دعویٰ کیا ہے کہ سلمان خان کی فلم ’رادھے‘ کی پہلے دن کی کمائی کا تخمینہ 105 کروڑ روپے ہے۔ اداکار سلمان خان کی جانب سے اپنی فلم کی کامیابی کے بارے میں ایک ٹوئٹ کرکے مداحوں کا شکریہ ادا کیا گیا۔ انہوں نے بتایا کہ ان کی فلم ’رادھے‘ کو پہلے دن 42 لاکھ (4.2 ملین) لوگوں نے دیکھا ہے جس پر وہ اپنے مداحوں کے شکر گزار ہیں۔

کمال آر خان کے مطابق سلمان خان کی فلم او ٹی ٹی پلیٹ فارم زی فائیو پر ریلیز کی گئی ہے، جس کی ماہانہ سبسکرپشن فیس 250 روپے ہے۔ اس حساب سے اگر پہلے دن 42 لاکھ سبسکرائبرز نے فلم دیکھی ہے تو اس کا مطلب ہے کہ فلم "رادھے" کی کمائی 105 کروڑ روپے ہے۔ کمال آر خان نے سلمان خان کی فلم کی کمائی کا تخمینہ پیش کرتے ہوئے انڈیا کے انکم ٹیکس ڈیپارٹمنٹ کو بھی ٹیگ کیا اور کہا کہ حکام کو اس بات کا پتہ ہونا چاہیے تاکہ ٹٰیکس بھی وصول کیا جا سکے۔

یو اے ای میں تھیٹرز کی 50 فیصد صلاحیت کے ساتھ رادھے نے اپنے افتتاحی دن پر 3 لاکھ 79 ہزار ڈالر کی کمائی کی، جوکہ ہندوستانی کرنسی کے مطابق 2 کروڑ 77 لاکھ 72 ہزار 778 دوپے ہے، کا کلکشن کیا۔ یہ نہ صرف سلمان خان کی گزشتہ فلم ’دبنگ-3‘ (2019) سے زیادہ ہے بلکہ ’گوڈزیلا ورسس کانگ‘ کی افتتاحی دن کی کمائی سے بھی زیادہ ہے۔ تہواری اختتام ہفتہ کے پیش نظر اس فلم کی کمائی میں اضافہ ہونے کے قوی امکانات ہیں۔