رانی مکھرجی نے اپنی بہترین اداکاری سے لوہا منوایا

بالی وڈ کی معروف اداکارہ رانی مکھرجی کی پیدائش 21 مارچ 1978 کو ممبئی میں ہوئی۔ انہوں نے بالی ووڈ میں اپنے کیریئر کا آغاز 1997 میں ریلیز ہونے والی فلم’ راجہ کی آئے گی بارات سے ‘کیا۔ اگرچہ یہ فلم ٹکٹ کھڑکی پر ناکام ثابت ہوئی، لیکن رانی اپنے سنجیدہ کردار سے ناظرین کی توجہ اپنی جانب مبذول کرانے میں کامیاب ہوگئیں۔ سال 1998 رانی کے کیریئر کے لیے ایک اہم سال ثابت ہوا۔ اس سال انہیں عامر خان کے ساتھ غلام اور شاہ رخ خان کے ساتھ کچھ کچھ ہوتا ہے میں کام کرنے کا موقع ملا۔ دونوں فلمیں ٹکٹ کھڑکی پر سپر ہٹ ثابت ہوئیں۔ رانی مکھرجی کو کچھ کچھ ہوتا ہے کے لیے بہترین معاون اداکارہ کے فلم فیئر ایوارڈ نوازا گیا۔

سال 1999 سے 2002 تک کے برس رانی مکھرجی کے کیرئیر کے لیے اچھے ثابت نہیں رہے۔ اس دوران رانی مکھرجی کی ہیلو برادر، بادل، ہر دل جو پیار کرے گا، حد کر دی آپنے، بچھو، کہیں پیار نہ ہو جائے، چوری چوری چپکے چپکے، بس اتنا ساخواب ہے، پیار دیوانہ ہوتا اور مجھ سے دوستی کروگے فلمیں ریلیز ہوئیں لیکن ٹکٹ کھڑکی پر یہ فلمیں متوقع کامیابی حاصل نہ کر سکیں۔ سال 2002 میں یش راج بینر تلے ریلیز ہونے والی فلم ساتھیا رانی مکھرجی کے کیرئیر کی ایک اور ہٹ فلم ثابت ہوئی۔ اس فلم میں وویک اوبرائے کے ساتھ رانی کی جوڑی کو کافی پسند کیا گیا تھا۔ رانی کو ایک بار پھر کنگ خان شاہ رخ خان کے ساتھ سال 2003 میں ریلیز ہونے والی فلم چلتے چلتے میں کام کرنے کا موقع ملا۔ یہ فلم بھی سپرہٹ ثابت ہوئی۔

سال 2004 رانی کے کیرئیر کے لیے ایک اہم سال ثابت ہوا۔ اس سال ان کی یووا، ہم تم اور ویر زارا جیسی فلمیں ریلیز ہوئیں۔ ان تمام فلموں میں، رانی نے اپنی کثیر جہتی صلاحیتوں کا مظاہرہ کیا اور اپنے ادا کردہ کرداروں کے ذریعے ناظرین کو مسحور کر دیا۔ سال 2005 میں ریلیز ہونے والی فلم ’بلیک‘ کا شمار رانی مکھرجی کے کیریئر کی اہم ترین فلموں میں ہوتا ہے۔ سنجے لیلا بھنسالی کی ہدایت کاری میں بننے والی اس فلم میں رانی مکھرجی کو صدی کے میگا اسٹار امیتابھ بچن کے ساتھ کام کرنے کا موقع ملا۔ رانی نے اپنی ٹھوس اداکاری سے نہ صرف شائقین بلکہ ناقدین کے بھی دل جیت لئے۔

سال 2005 میں ریلیز ہونے والی فلم بنٹی اور ببلی رانی مکھرجی کے کیریئر کی ایک اور سپر ہٹ فلم ثابت ہوئی۔ یش راج بینر تلے بننے والی اس فلم کے ذریعے رانی مکھرجی اور ابھیشیک بچن کی جوڑی نے اپنے کارناموں سے ناظرین کو خوب ہنسایا۔ سال 2006 میں رانی مکھرجی کو ایک بار پھر امیتابھ بچن کے ساتھ فلم بابل میں کام کرنے کا موقع ملا۔ گو کہ روی چوپڑا کی ہدایت کاری میں بنی یہ فلم ٹکٹ کھڑکی پر کچھ زیادہ کامیاب نہیں ہو سکی لیکن رانی کی اداکاری کو ناظرین نے ضرور پسند کیا۔ اسی سال رانی کی کرن جوہر کی ہدایت کردہ فلم کل ہو نا ہو ریلیز ہوئی جو ٹکٹ کھڑکی پر ہٹ ثابت ہوئی۔

سال 2007 سے 2010 تک کا وقت ایک بار پھر رانی مکھرجی کے کیرئیر کے لیے برا وقت ثابت ہوا۔ اس عرصے کے دوران ان کی تارا رم پم، لگا چنری میں داغ، تھوڑا پیار تھوڑا جادو، ساوریہ، لک بائی چانس، دل بولے ہڑپہ ریلیز ہوئیں لیکن یہ باکس آفس پر فلاپ ثابت ہوئیں۔ رانی کو مختلف کیٹیگریز میں سات بار فلم فیئر ایوارڈ سے نوازا جا چکا ہے۔ وہ بالی ووڈ کی ان چند اداکاراؤں میں شامل ہیں جنہوں نے تینوں خان - عامر خان، سلمان خان اور شاہ رخ خان کے ساتھ کام کیا ہے۔ بالی ووڈ کے چھوٹے نواب سیف علی خان، ابھیشیک بچن اور بوبی دیول کے ساتھ رانی مکھرجی کی جوڑی کو کافی پسند کیا گیا۔

رانی نے 2011 کی سپرہٹ فلم ’نو ون کلڈ جیسیکا‘ کے ذریعے ایک بار پھر شائقین کے دل جیت لیے۔ سال 2012 میں انہیں ایک بار پھر عامر خان کے ساتھ فلم تلاش میں کام کرنے کا موقع ملا۔ رانی نے مشہور فلمساز آدتیہ چوپڑا سے سال 2014 میں شادی کی۔ اسی سال رانی کی فلم مردانی ریلیز ہوئی جس میں انہوں نے اپنی زبردست اداکاری سے سامعین کو مسحور کیا۔ اس کے بعد رانی نے ہچکی اور مردانی 2 جیسی کامیاب فلموں میں کام کیا۔ سال 2023 میں رانی مکھرجی کی ’مسز چٹرجی ورسیز ناروے‘ ریلیز ہوئی۔ اس فلم میں رانی مکھرجی کی اداکاری نے شائقین کی کافی ستائش حاصل کی۔