اسرائیلی فوج نے غزہ میں ایک اور عمارت تباہ کردی، بھوک سے اموات کی تعداد 382 ہوگئی

اسرائیلی فوج نے ہفتے کے روز غزہ سٹی میں 'السوسی' نام کی ایک عمارت کو فضائی حملہ کرکے تباہ کردیا اور حماس پر الزام لگایا ہے کہ انہوں نے عمارت کے قریب دھماکہ خیز مواد نصب کیا تھا اور اسے نگرانی کے لیے استعمال کر رہے تھے۔ اس سے قبل اسرائیلی فوج نے غزہ سٹی میں عمارت 'الرؤیا' اور اس کے قریب خیموں میں پناہ گزینوں کو فوری طور پر خالی کرنے کا فوری انتباہ جاری کیا تھا۔

فوج نے ایک بیان میں کہا ہے کہ الرؤیا عمارت کے رہائشیوں اور اس کے قریب خیموں کے مکینوں کو جو بیروت چوک اور عرب لیگ ا سٹریٹ میں واقع ہیں۔ مطلع کیا جاتا ہے کہ دفاعی فوج عمارت پر جلد ہی حملہ کرے گی کیونکہ اس کے اندر یا اس کے قریب حماس کا انفراسٹرکچر موجود ہے۔ بیان میں انہیں ہدایت کی گئی کہ وہ فوری طور پر عمارت کو جنوب کی طرف خان یونس میں المواسی کے انسانی ہمدردی کے علاقے کی جانب خالی کر دیں۔ دریں اثنا غزہ کی پٹی میں فلسطینی وزارت صحت نے ہفتے کے روز گزشتہ 24 گھنٹوں کے دوران بھوک اور غذائی قلت کی وجہ سے 6 نئی ہلاکتوں کی اطلاع دی، جن میں ایک بچہ بھی شامل تھا۔

وزارت نے ایک بیان میں کہا ہے کہ اس طرح بھوک سے ہلاک ہونے والوں کی تعداد 382 ہو گئی ہے جن میں 135 بچے بھی شامل ہیں۔ وزارت نے یہ بھی زور دیا کہ غزہ کی پٹی میں انسانی بحران ناکہ بندی اور خوراک اور طبی سامان کی قلت کی وجہ سے مسلسل بگڑ رہا ہے اور عالمی برادری اور امدادی اداروں سے فوری مداخلت کی اپیل کی۔

ہفتے کی صبح اسرائیلی فوج نے غزہ کی پٹی کے شمال میں واقع غزہ شہر کے مکینوں کو جنوب میں ایک "انسانی ہمدردی کے علاقے" میں منتقل ہونے کی اپیل کی، تاکہ غزہ کے سب سے بڑے شہر پر متوقع زمینی حملے کی تیاری کی جا سکے۔ فوج نے کہا کہ انسانی ہمدردی کے علاقے میں فیلڈ اسپتال، پانی کی پائپ لائنیں، پانی صاف کرنے کے پلانٹس اور خوراک کی فراہمی جیسی بنیادی سہولیات شامل ہوں گی۔

فوج کے ایک ترجمان نے غزہ شہر کے مکینوں کو انسانی ہمدردی کے علاقے میں منتقل ہونے کی اپیل کی۔ انہوں نے کہا "ہم المواصی علاقے کو ایک انسانی ہمدردی کا علاقہ قرار دے رہے ہیں جہاں انسانی خدمات فراہم کرنے کا کام کیا جائے گا۔ اس موقع سے فائدہ اٹھائیں اور جلد از جلد انسانی ہمدردی کے علاقے میں منتقل ہو جائیں اور ان ہزاروں افراد میں شامل ہو جائیں جو پہلے ہی وہاں جا چکے ہیں۔

یہ اعلان ایسے وقت میں سامنے آیا ہے جب فوج غزہ شہر سے شہریوں کو جنوب کی طرف نکل جانے کی ترغیب دے رہی ہے، جہاں اس کی افواج حماس کے باقی ماندہ گڑھ پر قابو پانے کی کوشش کر رہی ہیں اور بالآخر پورے شہر پر قبضہ کرنا چاہتی ہیں۔ اقوام متحدہ کا تخمینہ ہے کہ غزہ شہر اور اس کے گرد و نواح میں تقریباً دس لاکھ افراد رہتے ہیں، اور وہ خبردار کر رہی ہے کہ اگر اسرائیل نے شہر پر وسیع پیمانے پر حملہ کیا تو ایک تباہی ہو گی۔ اقوام متحدہ کے عالمی خوراک پروگرام نے گزشتہ ہفتے خبردار کیا تھا کہ غزہ تباہی کے دہانے پر ہے۔

اس دوران ہفتے کی صبح سے غزہ کی پٹی پر مسلسل اسرائیلی فضائی حملوں میں 13 فلسطینی شہری ہلاک اور دیگر زخمی ہوئے۔ فلسطینی پریس ایجنسی "صفا" نے بتایا کہ مرنے والوں میں تین امداد کے خواہشمند شہری شامل ہیں جو غزہ کی پٹی کے جنوب میں خان یونس شہر کے جنوب مغرب میں الطینہ امدادی مرکز کے قریب اسرائیلی افواج کی فائرنگ سے ہلاک ہوئے۔

اسرائیلی فوج نے گزشتہ جمعے کو بھی غزہ شہر میں ایک عمارت کو تباہ کر دیا تھا جب اس نے اعلان کیا تھا کہ وہ ان بلند و بالا عمارتوں کو نشانہ بنائے گی جن کے بارے میں اس کا الزام ہے کہ حماس انہیں استعمال کر رہی ہے۔ یہ حملہ ایسے وقت میں کیا گیا ہے جب اسرائیل فلسطینی پٹی کے سب سے بڑے شہر پر قبضہ کرنے کے لیے اپنی کارروائیاں تیز کر رہا ہے، جہاں تقریباً دس لاکھ افراد موجود ہیں۔ (بشکریہ العربیہ ڈاٹ نیٹ، اردو)