اقوام متحدہ سے بیروت دھماکوں کی تحقیقات کا مطالبہ

بیروت دھماکوں میں پانچ ہزار سے زیادہ لوگ زخمی ہیں اور 130 افراد سے زیادہ ہلاک ہو ئے ہیں لیکن ابھی تک حکومت کی جانب سے کوئی ایسا بیان نہیں آیا ہے جس سے یہ اشارہ ملتا ہو کہ دھماکوں کے پیچھے کن طاقتوں کا ہاتھ ہے۔ لبنان کے چار سابق وزراء اعظم نے اقوام متحدہ یا عرب لیگ سے ان دھماکوں کی تحقیات کا مطالبہ کیا ہے۔

لبنان کے سابق وزراء اعظم سعد الحریری ، نجیب میقاتی ، فواد سنیورا اور تمام سلام نے بدھ کو ایک مشترکہ بیان میں کہا ہے کہ دھماکوں کی تحقیقات کے لیے اقوام متحدہ یا عرب لیگ کی ایک تحقیقاتی کمیٹی قائم کی جائے اور اس میں ’’شفاف‘‘ اور’’آزاد‘‘ جج شامل ہوں۔

انھوں نے بیان میں دھماکوں کی تباہ کاریوں سے نمٹنے اور زخمیوں کےعلاج معالجے کے لیے بیرونی دنیا سے امداد کی بھی اپیل کی ہے۔انھوں نے کہا:’’بیروت کو پھر آپ کی اور آپ کی مدد کی ضرورت ہے۔ایک مرتبہ پھر اس کے ساتھ کھڑے ہوجائیے۔‘‘

بیروت کے گورنر مروان عبود کے مطابق بندرگاہ کے علاقے میں تباہ کن دھماکوں کے نتیجے میں تین سے پانچ ارب ڈالر تک مالی نقصان ہوا ہے اور مکانات اور اپارٹمنٹ عمارتیں تباہ ہونے سے کم سے کم تین لاکھ افراد بے گھر ہوگئے ہیں۔

واضح رہے کہ لبنان پہلے ہی معاشی بحران سے دوچار ہے اور اس کو اس بحران سے نکلنے اور بجٹ خسارے پر قابو پانے کے لیے بیرونی امداد کی اشد ضرورت ہے۔اب آدھے بیروت شہر کی تباہی سے اس کے لیے مزید معاشی وسماجی مسائل پیدا ہو گئے ہیں۔ (بشکریہ العربیہ ڈاٹ نیٹ )