قومی آواز بلیٹن: ’مزدوروں کی موت پر مرکزی حکومت کے گھڑیالی آنسو‘؛ ’گرمی میں ملے گی کورونا سے راحت‘

مہاجر مزدوروں کی موت پر گھڑیالی آنسو بہا رہی ہے مرکزی حکومت: چدمبرم

سینئر کانگریسی رہنما اور سابق مرکزی وزیر داخلہ پی چدمبرم نے مرکز اور مختلف ریاستی حکومتوں پر کانگریس کے انتباہ کو نظر انداز کرنے کا الزام عائد کیا ہے۔ چدامبرم نے ہفتہ کو کہا کہ مرکزی حکومت مہاراشٹر میں مہاجر مزدوروں کے مال گاڑی سے کٹ کر ہلاک ہونے کے واقعہ پر گھڑیالی آنسو بہا رہی ہے۔ چدمبرم نے ٹوئٹ کر کے کہا کہ کانگریس نے پہلے ہی لاک ڈاؤن کے دوران روزگار، پیسے اور اناج کے بحران کا سامنا کر رہے مہاجر مزدوروں کا مسئلہ اٹھایا تھا۔ کانگریس نے غریب کنبوں کو نقدی اور اناج دیئے جانے کی مانگ بھی کی تھی، جس کا فائدہ مہاجر مزدوروں کو بھی ملتا۔ انہوں نے کہا کہ حکومتوں نے کانگریس کی اپیل پر توجہ نہیں دی۔

جولائی کی گرمی ہندوستان کو پہنچائے گی کورونا سے راحت: ڈبلیو ایچ او

ہندوستان میں کورونا وائرس کو لے کر ایک اچھی خبر سامنے آئی ہے۔ عالمی ادارہ صحت (ڈبلیو ایچ او) کے خصوصی سفیر ڈاکٹر ڈیوڈ نبارو کا کہنا ہے کہ ہندوستان میں کورونا وائرس کا گراف نیچے آنے والا ہے۔ جولائی ختم ہونے سے پہلے یہ وبا ہندوستان میں اپنے عروج والی سطح پر ہوگی۔ ڈاکٹر نبارو نے کہا کہ "جب لاک ڈاؤن ختم ہوگا تو مزید کیسز سامنے آئیں گے۔ لیکن لوگوں کو ڈرنے کی ضرورت نہیں ہے۔" انھوں نے مزید کہا کہ "لاک ڈاؤن کے فوراً بعد چند کچھ کیسز آئیں گے اور اس کے بعد وبا کی رخصتی ہو جائے گی۔ جولائی کے آخر میں کیسز بڑھیں گے لیکن حالات بہتر ہو جائیں گے۔"

کیا دہلی حکومت اموات کی تعداد چھپا رہی ہے؟

ایشلن میتھیو کی رپورٹ

کورونا وائرس سے متعلق جو بھی اعداد و شمار دہلی حکومت سامنے رکھ رہی ہے، ان کا جائزہ لینے کے بعد کچھ حیران کرنے والی باتیں سامنے آئی ہیں اور ایسا لگتا ہے کہ کیجریوال حکومت کورونا سے ہونے والی اموات کی صحیح تعداد چھپا رہی ہے۔ 2 مئی 2020 تک دہلی حکومت نے دعویٰ کیا ہے کہ ملک کی راجدھانی میں کورونا وائرس سے 65 لوگوں کی موت ہوئی ہے۔ لیکن دہلی کے دو اسپتالوں میں ایل این جے پی اور راجیو گاندھی اسپتال میں ہی 20 لوگوں کی موت ہوئی ہے جس کا تذکرہ دہلی حکومت نے نہیں کیا۔

دہلی حکومت نے کورونا وائرس کے تعلق سے بنائی گئی ویب سائٹ delhifightscorona.in/ پر جو ڈاٹا دیا ہے اس کے مطابق 2 مئی کے بعد 5 مئی تک دہلی میں کورونا سے ایک بھی موت نہیں ہوئی اور ایسے میں تعداد 64 تک ہی محدود ہے۔ حالانکہ دہلی میں کورونا متاثرین کی تعداد 2 مئی کے 4122 سے بڑھ کر 5 مئی تک 5104 پہنچ گئی۔ حکومت کے ذریعہ 6 مئی کو جاری ہیلتھ بلیٹن کے مطابق اس دوران صرف ایک شخص کی موت ہوئی ہے جو کہ دہلی پولس کا ایک کانسٹیبل تھا اور اس کی خبر سبھی جگہ شائع اور نشر ہوئی تھی۔ اب دہلی میں 5532 کیس ہیں جو مہاراشٹر اور گجرات کے بعد تیسرے نمبر پر ہے۔

خاتون ایئر انڈیا کے طیارہ سے شوہر کی لاش لیکر وطن پہنچی

متحدہ عرب امارات میں رہنے والے جن ہندوستانیوں کو لیکر ایئر انڈیا کے دو طیارہ چنئی گئے ہیں ان میں سے ایک میں خاتون اپنے شوہر کی لاش لیکر آئی ہے۔ 29 سالہ کولمل اپنے 35سالہ شوہر ایل کمار کی لاش لیکر جب ایئر انڈیا ایکسپریس پرواز آئی ایکس 540 سے دیگر مسافروں کے ساتھ طیارہ میں سوار ہوئیں تو اس دردناک منظر سے ہوائی اڈہ پر موجود تمام مسافر جذباتی ہوگئے۔ مرنے والے کی لاش کو طیارہ کے کارگو میں رکھ کر لایا گیا ہے۔

ایل کمار راس الخیمہ میں واقع راک سیریمکس میں بطور سینئر کوالٹی کنٹرولر افسر کام کرتے تھے اور 13 اپریل کو ڈیوٹی کے دوران دل کا دورہ پڑجانے سے ان کا انتقال ہوگیا تھا۔

برطانیہ میں کورونا وائرس کے خوف سے 3 لاکھ افراد نے سگریٹ نوشی ترک کر دی

برطانیہ میں کچھ عرصہ پہلے ہونے والے ایک نئے سروے کے مطابق کورونا وائرس کے پھیلاؤ کے دوران ملک کے مختلف حصوں میں 3 لاکھ سے زیادہ افراد نے سگریٹ نوشی ترک کر دی۔ یہ اقدام اس خوف کے پیش نظر کیا گیا کہ کووڈ-19 وائرس سے متاثر ہونے کی صورت میں سگریٹ نوشی اس مرض کو مزید خطرناک بنا دیتی ہے۔ واضح رہےامریکہ کے بعد برطانیہ وہ ملک ہے جہاں کورونا وائرس سے سب سے زیادہ اموات ہوئی ہیں۔

پوری دنیا میں کورونا سے ہلاک ہونے والوں کی تعداد پونے تین لاکھ سے تجاوز

• پوری دنیا میں کورونا کا قہر تھمنے کا نام نہیں لے رہا ہے۔ کورونا متاثرین کی تعداد پوری دنیا میں 40 لاکھ سے تجاوز کر گئی ہے وہیں اس وبا سے ہلاک ہونے والوں کی تعداد پونے تین لاکھ سے زیادہ ہو گئی ہے۔
• امریکہ میں متاثرین کی تعداد 13 لاکھ سے زیادہ ہو گئی ہے اور وہاں اموات کی تعداد 78 ہزار سے زیادہ ہے۔ برطانیہ میں کورونا سے ہلاک ہونے والوں کی تعداد 31 ہزار سے زیادہ ہو گئی ہے۔ اٹلی میں اس وبا سے ہلاک ہونے والوں کی تعداد 30 ہزار سے زیادہ ہے۔ اسپین اور فرانس میں یہ تعداد 26 ہزار سے زیادہ ہے۔
• روس میں کل دس ہزار نئے معاملوں کے رپورٹ ہونے کے بعد وہاں متاثرین کی تعداد 1 لاکھ 98 ہزار سے زیادہ ہے لیکن وہاں مرنے والوں کی تعداد 1827 ہے۔