رانچی ونڈے: ٹیم انڈیا نے جنوبی افریقہ کے سامنے رکھا 350 رنوں کا ہدف، وراٹ کوہلی نے بنائے 135 رن

رانچی میں ہندوستان اور جنوبی افریقہ کے درمیان کھیلے جا رہے 3 ونڈے سیریز کی پہلی اننگ کا اختتام ہو گیا۔ ٹیم انڈیا نے وراٹ کوہلی کی سنچری، سابق کپتان روہت شرما اور کپتان کے ایل راہل کی نصف سنچریوں کی بدولت 8 وکٹ کے نقصان پر 349 رنوں کا پہاڑ سا اسکور کھڑا کر دیا ہے۔ جنوبی افریقہ نے ٹاس جیت کر پہلے بلے بازی کرنے کا فیصلہ کیا۔ پہلے بلے بازی کرنے اتری ہندوستانی ٹیم کی شروعات بہتر نہیں رہی۔ سلامی بلے باز شبمن گل کی عدم موجودگی میں روہت شرما کے ساتھ اوپننگ کرنے آئے نوجوان بلے باز یشسوی جیسوال 18 رن بنا کر برگر کے شکار ہو گئے۔ اس کے بعد ٹیم انڈیا کے سینئر بلے باز روہت شرما اور وراٹ کوہلی کے درمیان 163 رنوں کی شراکت داری ہوئی۔

اگر ٹیم انڈیا کی بلے بازی کی بات کی جائے تو سلامی بلے باز یشسوی جیسوال (18 رن) بنا کر آؤٹ ہو گئے۔ دوسرے سلامی بلے باز روہت شرما نے 51 گیندوں کا سامنا کرتے ہوئے 5 چوکے اور 3 چھکے کی مدد سے شاندار 57 رنوں کی اننگ کھیلی۔ تیسرے نمبر پر بلے بازی کرنے آئے وراٹ کوہلی نے 120 گیندوں کا سامنا کرتے ہوئے 135 رنوں کی بہترین اننگ کھیلی۔ انہوں نے اپنی اننگ میں 11 چوکے اور 7 شاندار چھکے لگائے۔ چوتھے نمبر پر بلے بازی کرنے آئے رتوراج گائیکواڈ (8 رن) اور واشنگٹن سندر (13 رن) جلدی جلدی آؤٹ ہو گئے۔ روہت اور کوہلی کے علاوہ کپتان کے ایل راہل نے (60 رن) اور رویندر جڈیجہ نے (32 رن) کی بہترین اننگ کھیلی۔

جنوبی افریقہ کے تمام گیند بازوں کی ہندوستانی بلے بازوں نے جم کر پٹائی کی۔ سب سے مہنگے گیند باز آل راؤنڈر مارکو یانسن ثابت ہوئے، انہوں نے 10 اوورس میں 76 رن دے ڈالے۔ جنوبی افریقہ کی جانب سے مارکو یانسن، نانندرے برگر، کوربن بوش اور اوٹنیل بارٹ مین 2-2 وکٹ حاصل کرنے میں کامیاب ہوئے۔

واضح رہے کہ وراٹ کوہلی ونڈے کرکٹ کی تاریخ میں سب سے زیادہ سنچری بنانے والے بلے باز بن چکے ہیں۔ جنوبی افریقہ کے خلاف پہلے ون ڈے میں انہوں نے اپنے کیرئیر کی 52ویں ون ڈے سنچری بنائی۔ ساتھ ہی بین الاقومی کرکٹ میں مجموعی طور پر یہ ان کی 83ویں سنچری تھی۔ وراٹ کے علاوہ روہت شرما نے بھی ایک ریکارڈ بنا ڈالا، انہوں نے ونڈے میں سب سے زیادہ چھکے مارنے کا ریکارڈ توڑ دیا۔ روہت نے پاکستانی آل راؤنڈر شاہد آفریدی کے 351 چھکے کا ریکارڈ توڑ دیا، اب روہت شرما کے نام 352 چھکے ہیں۔