اودھ اوجھا نے عام آدمی پارٹی سے ناتا توڑا، سیاست سے کیا مکمل کنارہ کشی کا اعلان

دہلی اسمبلی انتخاب سے قبل عام آدمی پارٹی (عآپ) میں شامل ہوئے معروف ٹیچر اودھ اوجھا اب مکمل طور سے سیاست سے دور ہو چکے ہیں۔ اپنی چھوٹی سی سیاسی اننگ کے بعد ہی انہوں نے ریٹائرمنٹ کا اعلان کر دیا ہے۔ ایک پوڈ کاسٹ میں انہوں نے اس فیصلہ کو زندگی کا سب سے اچھا فیصلہ قرار دیا ہے۔ ان کا کہنا ہے کہ سیاست چھوڑنے کے بعد وہ پہلے سے زیادہ خوش ہیں، کیونکہ اب من کی بات کہنے کی مکمل آزادی ہے۔

اودھ اوجھا نے واضح طور پر کہا کہ سیاست میں رہتے ہوئے ان کے لیے سب سے بڑی مشکل یہ تھی کہ وہ کھل کر اپنی بات نہیں کہہ پا رہے تھے۔ انہوں نے کہا کہ پہلی بات تو بولنا بند ہو گیا تھا۔ پارٹی لائن کے باہر نہیں بول سکتے۔ ہم بولیں گے نہیں تو مر جائیں گے۔ اب میں اتنا اچھا محسوس کر رہا ہوں کہ آج مجھے فون کر کے کوئی یہ نہیں کہے گا کہ کیا بولنا ہے۔ اب تو وہی بولیں گے جو ہمارا دل کہے گا۔

اودھ اوجھا نے بتایا کہ انتخاب لڑنے کے بعد انہیں احساس ہوا کہ سیاست ان کے لیے صحیح راستہ نہیں ہے۔ ساتھ ہی انہوں نے یہ بھی واضح کر دیا کہ وہ کسی بھی دوسری پارٹی، خاص طور سے بی جے پی میں شامل ہونے کی بات کو مکمل طور سے خارج کرتے ہیں۔ ان کا یہ بھی کہنا تھا کہ ’’بھیا میں سیاست ہی نہیں کروں گا، دور رہوں گا، بہت خوش ہوں۔‘‘ اودھ اوجھا نے بتایا کہ انتخاب لڑنا ایک خواب تھا، اسی جذبے سے وہ سیاست میں آئے تھے۔ لیکن اب ان کا خیال ہے کہ سیاست ان کے مزاج کے مطابق نہیں ہے اور اپنے پرانے تدریسی پیشے میں لوٹ کر وہ زیادہ خوش ہیں۔

واضح رہے کہ اودھ اوجھا دہلی کے سابق نائب وزیر اعلیٰ منیش سسودیا کی چھوڑی ہوئی سیٹ پٹپڑ گنج سے عام آدمی پارٹی کے ٹکٹ پر اسمبلی انتخاب لڑے تھے۔ لیکن انہیں شکست کا سامنا کرنا پڑا تھا۔ انتخاب کے بعد سے ہی وہ پارٹی کی سرگرمیوں سے دور نظر آنے لگے تھے اور اب انہوں نے سیاست کو مکمل طور پر خیرباد کہنے کا اعلان کر دیا ہے۔