جرمنی میں بیئر کی بوتلوں کی قلت، بیئر کمپنیاں پریشان

جرمن بیئر بنانے والی کمپنیوں نے حکام اور گاہکوں کو متنبہ کیا ہے کہ رواں موسم گرما کے اگلے ہفتوں میں بوتلوں کی عدم دستیابی کے تناظر میں بیئر کی قلت ہو سکتی ہے۔

جرمنی میں بیئر بنانے والی کمپنیوں کی تنظیم جرمن بریورز فیڈریشن (جرمن براؤر بُنڈ) کے چیف ایگزیکٹیو ہولگر آئشلے کا کہنا ہے کہ تمام بیئر کمپنیاں ابھی سے بوتلوں کی ممکنہ قلت کا اندازہ لگا چُکی ہیں۔

بیئر کی بوتلوں میں کمی کے حوالے سے ہولگر آئشلے کا بیان جرمن اخبار بلٹ میں شائع ہوا ہے اور انہوں نے صورت حال کو شدید پریشان کن قرار دیا ہے۔

ایک اور تنظیم برلن برانڈنبرگ بریورز ایسوسی ایشن کے نائب سربراہ اشٹیفان فرٹشے کا کہنا ہے کہ بوتلوں کی کمی پیدا ہوگی تو اس کی وجہ سے چھوٹی اور درمیانی حجم کی کمپنیوں کو گہری پریشانی اور کاروباری نقصان کا سامنا ہو سکتا ہے۔

سب سے بڑی وجہ انرجی کی قیمتوں میں اضافہ بتایا گیا ہے۔ اس باعث بوتلوں کی پروڈکشن کے اخراجات غیر معمولی طور پربڑھ گئے ہیں۔ ہولگر آئشلے نے ایک اور وجہ بتائی کہ ٹرک ڈرائیوروں کی کمی پیدا ہو چکی ہے اور اس باعث سپلائی میں تسلسل رکھنا مشکل ہو چکا ہے۔

انہوں نے مزید بتایا کہ طویل مدتی کنٹریکٹ رکھنے والے بریورز کو اب بوتلوں کی خریداری پر اسّی فیصد زیادہ قیمت دینی پڑ رہی ہے جب کہ ایک سال قبل ایسا نہیں تھا۔ انہوں نے بیئر پینے والوں سے درخواست کی ہے کہ وہ خالی بوتلیں جلد از جلد واپس کرنے کی عادت اپنائیں۔

بوتلوں کی کمیابی اور ٹرک ڈرائیوروں کی قلت نے بیئر کی مناسب سپلائی پر نہایت گہرے منفی اثرات مرتب کیے ہیں۔ ہولگر آئشلے کا کہنا ہے کہ کئی فیکٹریوں نے تو کہہ دیا ہے کہ اگر صورتِ حال جوں کی توں رہی تو وہ جلد بیکار ہو جائیں گے کیوں کہ ان کے پاس بوتلیں ہی نہیں ہوں گی تو بھریں گے کس میں۔ بیئر فیڈریشن نے اسے ایک پریشان کن معاملہ قرار دیا ہے۔

جرمنی میں بیئر گلاس اور پلاسٹک کی بوتلوں میں دستیاب ہوتا ہے اور خریدار ان کو خریدتے وقت ایک معمولی سی رقم بوتل کی مد میں بھی ادا کرتے ہیں۔ یہ رقم کسٹمرز کو بوتل واپس کرنے پر واپس ادا کر دی جاتی ہے۔

رواں موسم گرما میں کھلے موسم اور کھلی جگہوں میں بیئر پینا کووڈ انیس کی وبا سے پہلے جیسا ہونے جا رہا ہے کیوں کہ اب تقریباً تمام کورونا پابندیاں ختم ہوتی جا رہی ہیں۔