یوکرین میں رہائشی عمارت پر میزائل گرنے سے متعدد افراد ہلاک

یوکرینی حکام کے مطابق ایک روسی میزائل نے ملک کے مشرق میں واقع کراماٹورسک شہر کی ایک رہائشی عمارت کو نشانہ بنایا ہے۔ علاقائی پولیس نے بتایا کہ اس میزائل حملے میں کم از کم تین افراد ہلاک اور 30 دیگر زخمی ہوئے ہیں۔ ہلاکتوں کی تعداد میں اضافہ ہونے کا خدشہ ہے۔

پولیس نے فیس بک پر ایک پوسٹ میں بتایا، "عمارت کے کم از کم آٹھ اپارٹمنٹ کو نقصان پہنچا ہے۔ ان میں سے ایک اپارٹمنٹ پوری طرح تباہ ہوگیا۔"

پولیس نے بتایا کہ میزائل حملے کا نشانہ بننے والی عمارت کے مقام پر تلاش اور بچاو کی کوششیں جاری ہیں۔ یوکرین کے صدر وولودویمیر زیلنسکی نے ایک ٹوئٹر پوسٹ میں کہا، "کراماٹورسک۔ روسی دہشت گردوں نے شہر پر ایک بیلسٹک میزائل سے حملہ کیا ہے، جس کے نتیجے میں شہری ہلاکتیں ہوئی ہیں۔ کچھ لوگ اب بھی ملبے تلے دبے ہوئے ہیں۔ اس کا مقصد دہشت گردی کے علاوہ اور کچھ نہیں تھا۔ روسی دہشت گردی کو روکنے کا واحد راستہ اسے شکست دینا ہے۔ ٹینکوں کے ذریعہ۔ جنگی طیاروں کے ذریعہ۔ طویل دوری تک مار کرنے والے میزائلوں کے ذریعہ۔"

زیلنسکی نے رات کے اپنے معمول کے خطاب میں کہا کہ ملک کے مشرقی حصے میں دشمن کی کارروائیوں میں اضافہ ہوا ہے۔ صدر زیلنسکی کا کہنا تھا، "ہمارے ملک کے مشرق میں محاذ پر قابضین کی جارحانہ کارروائیوں میں یقیناً اضافہ ہوا ہے۔ صورت حال مزید سخت ہو گئی ہے۔"

انہوں نے مزید کہا،"روس اپنی فوجی کارروائی شروع کرنے کے ایک برس مکمل ہونے سے قبل "کم از کم کچھ حاصل کرنے کی کوشش کر رہا ہے۔"