اناسی ہلاک، اکسٹھ لاپتہ مگر ایک بلّی بچ گئی

امریکی حکام نے بتایا کہ بنکس نامی یہ بلّی منہدم ہونے والی رہائشی عمارت کی نویں منزل پر ایک مکان میں رہتی تھی۔ بنکس کو اب اس کے مالکان کے حوالے کر دیا گیا ہے۔

امریکی ریاست جنوبی فلوریڈا کے چھوٹے سے شہر سرف سائڈ میں چوبیس جون کو ایک رہائشی عمارت منہدم ہو گئی تھی۔ بارہ منزلہ عمارت کا نام 'چیمپلین ٹاورز‘ تھا۔ اس حادثے میں اب تک اناسی افراد کی ہلاکت کی تصدیق ہو چکی ہے جب کہ اکسٹھ ابھی تک لاپتہ ہیں۔

’دا کٹی کیمپس‘ کی شریک بانی جینا نکول ولاسیک نے فیس بک پر ایک پوسٹ کے ذریعے اس پیش رفت کی اطلاع دی۔ انہوں نے جمعرات کی شب بنکس کے جیسی دکھنے والی سیاہ رنگ کی ایک بلی کی تصویر شیئر کی، جسے میامی بیچ پر اس گروپ کے ایک مرکز پر لایا گیا تھا۔ بعد ازاں جمعے کو 'چیمپلین ٹاورز‘ کے ایک سابق رہائشی اور بنکس کے مالک نے اس بلّی کو پہچان لیا۔ جینا نکول ولاسیک نے فیس بک پر ایک اور پوسٹ میں لکھا کہ وہ کافی خوش ہیں کہ یہ ممکن ہو سکا۔

میامی ڈیڈ کاؤنٹی کی میئر ڈینیئلا لیوائن کاوا نے جمعے کو ایک پریس کانفرنس سے خطاب کرتے ہوئے بتایا کہ ایک رضاکار منہدم ہونے والی رہائشی عمارت کے پاس بلّیوں کو کھانا کھلا رہا تھا کہ اس نے بنکس کو شناخت کیا۔

انہوں نے مزید کہا، "میں پر مسرت ہوں کہ یہ چھوٹا سا معجزہ غم زدہ خاندانوں کے لیے کچھ اچھی خبر کا باعث بن سکا۔ یہ اس سانحے میں ہماری پوری برادری کے لیے خوشی کا ایک لمحہ تھا۔"