جامعہ ہمدرد کو حکومت ہند نے ’چھٹے کشمیری یوتھ ایکسچینج پروگرام‘ کی میزبانی کے لیے کیا منتخب

نئی دہلی: جامعہ ہمدرد (ایک گورنمنٹ ایڈیڈ ڈیمڈ ٹو بی یونیورسٹی)، وزارت داخلہ اور وزارت برائے امور نوجوانان و کھیل کے اشتراک سے 17 سے 22 جنوری 2026 تک ’میرا بھارت/این ایس ایس چھٹا کشمیری یوتھ ایکسچینج پروگرام‘ منعقد کر رہا ہے۔ افتتاحی تقریب حکیم عبدالحمید آڈیٹوریم، جامعہ ہمدرد، نئی دہلیمیں 17 جنوری بروز ہفتہ دوپہر 2 بجے ہوگی۔ وزیر تعلیم آشیش سود اس موقع پر مہمان خصوصی ہوں گے اور کرنل طاہر مصطفی، رجسٹرار، جامعہ ہمدرد گیسٹ آف آنر  ہوں گے۔  تقریب کی صدارت جامعہ ہمدرد کے عارضی وائس چانسلر  پروفیسر اصغر علی کریں گے۔

جامعہ ہمدرد کو وزارت داخلہ اور وزارت برائے امور نوجوانان و کھیل، حکومت ہند نے باوقار ’ایک بھارت شریشٹھ بھارت – وطن کو جانو‘ چھٹے کشمیری یوتھ ایکسچینج پروگرام کی میزبانی کے لیے منتخب کیا ہے۔ جامعہ ہمدرد کے رجسٹرار کرنل طاہر نے اس تعلق سے خوشی اور تشکر کا اظہار کرتے ہوئے کہا کہ یہ یونیورسٹی کے تئیں حکومت ہند کا اعتماد ظاہر کرنے والا قدم ہے۔ یہ اس بات پر مہر بھی ہے کہ جامعہ ہمدرد نوجوانوں کی بیداری و بااختیار بنا کر قومی ترقی و قومی یکجہتی میں بامعنی کردار ادا کر رہا ہے۔

پریس کانفرنس کے دوران میڈیا سے بات چیت کرتے ہوئے کرنل طاہر نے کہا کہ دہلی میں قومی اہمیت کے کئی اہم اداروں بشمول دہلی یونیورسٹی، آئی آئی ٹی دہلی، جامعہ ملیہ اسلامیہ اور جواہر لال نہرو یونیورسٹی وغیرہ کی موجودگی میں جامعہ ہمدرد کا انتخاب امتیازی اور فخر کا معاملہ ہے، جو ادارے کی مضبوط علمی ساکھ اور قومی وابستگی کی عکاسی کرتا ہے۔

جامعہ ہمدرد کے عارضی وائس چانسلر  پروفیسر اصغر علی نے میڈیا سے خطاب کرتے ہوئے اس بات پر روشنی ڈالی کہ ’ایک بھارت– شریشٹھ بھارت پروگرام‘ تنوع میں اتحاد کے جذبے کو ابھارتا ہے اور اس کا مقصد ملک کے مختلف خطوں سے تعلق رکھنے والے نوجوانوں کے درمیان ثقافتی افہام و تفہیم، جذباتی انضمام اور قائدانہ ترقی کو فروغ دینا ہے۔ انہوں نے اس بات پر زور دیا کہ جامعہ ہمدرد کو تعلیم، مکالمے اور مشترکہ تجربات کے ذریعے وادی کشمیر کے نوجوان ذہنوں کو قومی دھارے سے جوڑنے کے لیے ایک پل کے طور پر کام کرنے پر فخر ہے۔

قابل ذکر ہے کہ جامعہ ہمدرد اس چھ روزہ پروگرام کی میزبانی کرے گا، جس میں کشمیر کے 6 اضلاع اننت ناگ، بارہمولہ، بڈگام، کپواڑہ، پلوامہ اور سری نگر کے 18 سے 25 سال کی عمر کے 132 نوجوان شرکت کریں گے۔ شرکاء علمی معاملات، ثقافتی تبادلے کے پروگراموں، قیادت کی ورک شاپس، کیرئیر کاؤنسلنگ سیشنز، ادارہ جاتی دوروں اور قومی ترقی کے اقدامات کی نمائش میں مشغول ہوں گے۔