عمران پرتاپ گڑھی کی کوششیں رنگ لائیں، ہماچل پردیش واقع سنجولی مسجد کیس میں عدالت سے ملی راحت

نئی دہلی: ہماچل پردیش کی مشہور ’سنجولی مسجد‘ کیس میں کانگریس کے راجیہ سبھا رکن عمران پرتاپ گڑھی کی کوششیں رنگ لائی ہیں۔ ہماچل پردیش واقع سنجولی مسجد کو لے کر گزشتہ کئی مہینوں سے 2 برادریوں کے درمیان بڑا تنازعہ چل رہا تھا۔ دونوں فرقے اس معاملے پر ایک طویل جھگڑے میں مصروف تھے اور کچھ بی جے پی حامی افراد نے ریاست کے ماحول کو خراب کرنے کے لیے مداخلت کی تھی۔ دریں اثناء سنجولی مسجد کمیٹی نے دہلی میں آل انڈیا کانگریس کمیٹی کے اقلیتی شعبہ کے قومی صدر اور رکن پارلیمنٹ عمران پرتاپ گڑھی سے ملاقات کی اور اپنی پریشانیوں سے واقف کرایا۔ اسی وقت عمران پرتاپ گڑھی نے مسجد کمیٹی کے تمام ارکان اور عہدیداروں کے ساتھ کانگریس تنظیم کے جنرل سکریٹری کے سی وینوگوپال سے ملنے ان کی رہائش پہنچے اور ہماچل کے ماحول کو خراب ہونے سے روکنے کے لیے مداخلت کرنے کی اپیل کی۔

عمران پرتاپ گڑھی کے اقدام کے بعد کانگریس حکومت نے معاملے کی سنگینی کو دیکھتے ہوئے ہماچل پردیش کے وزیر اعلیٰ سکھوندر سنگھ سکھو کو حکم دیا کہ ریاست کا ماحول خراب ہونے سے بچائیں اور سنجولی مسجد کی حفاظت ہر حال میں کریں۔ مزید برآں کانگریس لیڈر عمران پرتاپ گڑھی نے عدالتی نظام میں اپنا بھروسہ رکھتے ہوئے سنجولی مسجد معاملے کے سلسلے میں چنڈی گڑھ ہائی کورٹ سے رجوع کیا۔ آج چنڈی گڑھ ہائی کورٹ نے سنجولی مسجد سے وابستہ افراد کو راحت دی۔ اس نے اپنے حکم میں حکم امتناعی دے دیا ہے۔

اس سے قبل بھی کانگریس رکن پارلیمنٹ عمران پرتاپ گڑھی ملک کے ہر سنگین مسئلے پر آواز اٹھاتے رہے ہیں۔ چاہے وہ ہلدوانی کی رہائشی بن پھول بستی کو بچانے کی کوشش ہو یا ملک کی پارلیمنٹ میں نجیب کا معاملہ اٹھانے کا، یا پھر طلبا کی فیسوں میں اضافے کا معاملہ ہو یا جامعہ میں طلبا کی پٹائی کا معاملہ، مہاراشٹر میں اقلیتوں کے بچوں کے لیے حج ہاؤس میں دوبارہ سے مفت کوچنگ شروع کرنے کا معاملہ ہو یا اسی طرح کے دیگر اہم معاملے رکن پارلیمنٹ عمران پرتاپ گڑھی ہر مسئلے پر اپنی مستعدی دکھاتے ہوئے حل تلاش کرنے کی کوشش کرتے نظر آ تے ہیں۔