نظم: بزم مئے کشاں.. عاصمہ جہانگیر کو خراج عقیدت

یہ کون تھا جو اُ ٹھ گیا
بزمِ مئے کشاں سے آج
بن بتائے دوستوں کو
الوداع کہے بغیر
دردِ دل سمیٹ کر
نقشِ پا بکھیرکر

مئے تھی اسکے جام میں
یا لہو کے گھونٹ تھے
زندگی کی تال پر
رقص تھا، سرور تھا
یا کہ
جلتی ریت پر
آبلے تھے پاؤں کے
نغماہائے شام غم تھے
یا جنون انقلاب
مستیِ صبا تھی یا
بجھے دلوں کا نور تھا

بزمِ غم سجاؤ آج
یا کہ جشن زندگی
دونوں ساتھ ، ساتھ ہیں
دونوں ہم کلام ہیں

دوستوں اٹھاؤ جام
یار کو بدا کرو
دوستی کا حق
اٹھو
آج پھر ادا کرو
نَقش پا ہیں منتظر
منزلیں ہیں منتظر

(عاصمہ جہانگیر کے ناگہانی گزر جانے پر ہند پاک دوستی کے نام)