پاکستان نے یو اے ای سے لیے قرض کی آخری قسط جمع کی، لیکن سعودی عرب کے سامنے پھیلانا پڑا ہاتھ

پاکستان کی معیشت مشکل حالات سے گزر رہی ہے۔ عالمی حالات بھی کچھ ایسے بن گئے ہیں کہ پاکستان کی پریشانیاں بڑھتی ہی جا رہی ہیں۔ ظاہر ہے ایسے میں یو اے ای کے ذریعہ پاکستان سے قرض ادائیگی کا مطالبہ کرنا شہباز حکومت کی دشواریاں بڑھانے والا تھا۔ پھر بھی پاکستان نے یو اے ای سے لیے گئے قرض کی آخری قسط بھی ادا کر دی ہے، لیکن اس کے لیے پاکستان کو سعودی عرب کے سامنے ہاتھ پھیلانا پڑا۔ یعنی ایک ملک سے لیے گئے قرض کو ادا کرنے کے لیے دوسرے ملک سے قرض لینا پڑا۔

یو اے ای کو قرض ادا کیے جانے کی جانکاری پاکستان اسٹیٹ بینک نے دی ہے۔ بینک کا کہنا ہے کہ اس نے مقرر کردہ ڈیڈلائن سے پہلے ہی یو اے ای کا مکمل قرض ادا کر دیا ہے۔ یو اے ای نے پاکستان کو اس ماہ کے آخر تک 3.45 بلین ڈالر کی رقم ادا کرنے کا وقت دیا تھا۔ یہ پیسے پاکستان نے 2019 کے دوران یو اے ای سے قرض کی شکل میں لیے تھے۔ پاکستان اسٹیٹ بینک کی طرف سے جاری بیان کے مطابق 2.45 بلین ڈالر کی رقم پہلے ہی یو اے ای کو دی جا چکی تھی، اور اب ایک بلین ڈالر کی آخری قسط بھی دے دی گئی ہے۔ یہ پیسے 2 دن قبل ہی پاکستان کو سعودی عرب نے دیے تھے۔

قابل ذکر ہے کہ یو اے ای نے مشرق وسطیٰ میں جاری جنگ کے دوران پاکستان سے اپنا پیسہ واپس مانگا تھا۔ ابتدا میں پاکستان نے اسے ادا کرنے کے لیے یو اے ای سے مہلت مانگی، لیکن جب یو اے ای راضی نہیں ہوا تو پاکستان نے سعودی عرب اور قطر سے رابطہ کیا۔ دراصل یو اے ای موجودہ سیاسی ماحول میں پاکستان سے ناراض ہے۔ یو اے ای کا کہنا ہے کہ پاکستان کو ایران اور امریکہ کے درمیان جنگ بندی معاملہ میں نہیں کودنا چاہیے تھا، کیونکہ اس سے یو اے ای کے مفادات کو نقصان پہنچ رہا ہے۔ یہی وجہ ہے کہ یو اے ای کسی بھی حال میں پاکستان کو بخشنا نہیں چاہتا۔

غور کرنے والی بات یہ بھی ہے کہ پاکستان مشرق وسطیٰ میں سعودی عرب اور ترکیے کے ساتھ اتحاد بنا رہا ہے۔ یہ مشرق وسطیٰ کی سیاست میں یو اے ای کے خلاف ہے۔ فوراً قرض کا پیسہ مانگنے کی ایک وجہ یہ بھی ہے۔ دلچسپ بات یہ ہے کہ سعودی نے ہی یو اے ای کے قرض کو ادا کرنے کے لیے پاکستان کو پیسے دیے ہیں۔ یعنی پاکستان اور یو اے ای کے درمیان رشتے آنے والے دنوں میں مزید خراب ہو سکتے ہیں۔