’آپ نے شروع کیا، ہم اس کا خاتمہ کریں گے‘، ٹرمپ کو بڑے حملے کے لیے تیار رہنے کی ایران کی سخت وارننگ

ایران-اسرائیل کے درمیان جاری جنگ نے اب دھماکہ خیز شکل اختیار کر لی ہے۔ امریکی فوج کے ذریعہ پہلی مرتبہ براہ راست مداخلت کرتے ہوئے ایران کے تین اہم جوہری ٹھکانوں اصفہان، نتانج اور فورڈو پر حملہ کیا گیا۔ امریکہ کی اس حرکت کے بعد پوری دنیا میں کھلبلی مچ گئی ہے۔ اس درمیان ایران نے امریکی صدر ڈونالڈ ٹرمپ کو وارننگ دیتے ہوئے کہا ہے کہ، ’’تم نے شروع کیا، ہم ختم کریں گے‘‘۔

’نیو یارک ٹائمز‘ کی رپورٹ کے مطابق ایران نے امریکی حملے کی بات مانی ہے۔ امریکی حملے کے بعد ایران کے سرکاری ٹیلی ویژن سے سیدھی وارننگ جاری کی گئی ہے۔ سرکاری ٹی وی چینل پر ڈونالڈ ٹرمپ کو وارننگ دیتے ہوئے کہا گیا ہے، ’’آپ نے شروع کیا ہے، اب ہم اس کا خاتمہ کریں گے۔‘‘

اس سے پہلے ایرانی میڈیا نے امریکی حملے کی تصدیق کرتے ہوئے بتایا تھا کہ امریکی فوج کی طرف سے جدید ترین میزائل سسٹم اور ڈرونز کے ذریعہ نیوکلیئر سائٹ پر حملہ کیا گیا۔ حالانکہ ایرانی نیوز چینلوں نے یہ بھی دعویٰ کیا کہ ایران نے اس حملے سے پہلے ہی اپنے یورینیم ذخیرہ کو منتقل کر دیا تھا۔ مارچ 2025 میں ہی ایران نے اپنے حساس جوہری آلات کو محفوظ مقامات پر بھیجنے کا منصوبہ بنایا تھا۔

ایران کے سپریم لیڈر آیت اللہ علی خامنہ ای نے بھی امریکہ کو سخت انتباہ کرتے ہوئے کہا، ’’امریکہ کو اب پہلے سے زیادہ نقصان اور حملے کے لیے تیار رہنا چاہیے۔‘‘ خامنہ ای کے اس بیان سے واضح ہو گیا ہے کہ ایران اب پیچھے ہٹنے والا نہیں ہے بلکہ وہ اسرائیل کے ساتھ ساتھ امریکہ کو بھی سخت جواب دے گا اور کسی بھی وقت وہ خود پر ہوئے حملے کا بدلہ لے سکتا ہے۔

وہیں امریکی صدر ڈونالڈ ٹرمپ نے سوشل میڈیا پلیٹ فارم ’ٹروتھ‘ پر ایران کو وارننگ دیتے ہوئے کہا تھا کہ اگر ایران نے کوئی جوابی کارروائی کی تو امریکہ اس کا جواب اور بھی زیادہ طاقت سے دے گا۔ ٹرمپ نے کہا کہ جو گزری رات ہوا، وہ تو صرف شروعات تھی۔

واضح رہے کہ امریکہ نے گزری رات ایران کے تین بڑے جوہری ٹھکانوں فورڈو، نتانج اور اصفہان پر حملہ کیا۔ ٹرمپ نے حملے کی اطلاع دیتے ہوئے کہا کہ سبھی بم بردار طیارے کامیابی کے ساتھ حملے کے بعد ایران کی فضائی سرحد سے باہر نکل آئے اور سبھی محفوظ ہیں۔ انہوں نے اپنے فوجیوں کی تعریف کرتے ہوئے کہا کہ دنیا کی کوئی اور فوج ایسا نہیں کر سکتی تھی۔ انہوں نے کہا، ’’اب شانتی کا وقت ہے‘‘۔