نیتن یاہو نے ٹرمپ کی تعریف کی، کہا، ’طاقت کے زور پر ہی امن قائم ہوتا ہے‘

امریکہ کی طرف سے ایران کے تین اہم جوہری ٹھکانوں پر شدید فضائی حملوں کے بعد خطے میں زبردست کشیدگی کا ماحول ہے۔ اس درمیان ایران کے سخت جوابی حملوں سے حیران و پریشان اسرائیلی وزیر اعظم بنجامن نیتن یاہو نے امریکہ کے ساتھ آنے سے راحت کی سانس لی ہے۔ یاہو نے کہا کہ طاقت کے ذریعہ ہی امن قائم ہوتا ہے۔ انہوں نے کہا کہ پہلے طاقت آتی ہے، پھر امن قائم ہوتا ہے۔ یاہو نے ایران پر امریکی حملوں کے تعلق سے ڈونالڈ ٹرمپ کی خوب تعریف کی۔

اسرائیلی وزیر اعظم نیتن یاہو نے امریکی صدر ٹرمپ کی تعریف کرتے ہوئے کہا، ’’صدر ٹرمپ اور میں اکثر کہتے ہیں کہ طاقت کے زور پر ہی امن.... پہلے طاقت آتی ہے، پھر امن قائم ہوتا ہے۔ اور آج رات ڈونالڈ ٹرمپ اور ریاستہائے متحدہ امریکہ نے بہت طاقت کے ساتھ کام کیا۔‘‘ یاہو نے ٹرمپ کو مبارکباد دیتے ہوئے کہا کہ ایران کے جوہری ٹھکانوں کے خلاف کی گئی کارروائی میں امریکہ نے واقعی بے جوڑ کام کیا ہے۔

دراصل امریکی صدر ٹرمپ نے اتوار کی صبح اطلاع دی تھی کہ امریکہ نے ایران کے تین جوہری ٹھکانوں پر حملے پورے کر لیے ہیں۔ ان میں فورڈو، نتانج اور اصفہان کے ٹھکانے شامل ہیں۔ انہوں نے کہا کہ ہمارے سبھی طیارے اب ایران کے فضائی علاقے سے باہر ہیں۔ خاص مقام فورڈو پر بموں کا پورا پیلوڈ گرایا گیا۔

ادھر ایران پر امریکی حملے کے بعد اقوام متحدہ کے سکریٹری جنرل انٹونیو گوٹیرس نے کہا کہ وہ ایران پر امریکہ کے ذریعہ کیے گئے طاقت کے استعمال سے کافی فکرمند ہیں۔ انہوں نے سبھی رکن ممالک سے کشیدگی کم کرنے، اقوام متحدہ کے چارٹر کو بنائے رکھنے اور لڑائی کے بجائے ڈپلومیسی کو چننے کی گزارش کی۔ وہیں قوم سے خطاب کرتے ہوئے ڈونالڈ ٹرمپ نے کہا، ’’ایران کو اب امن قائم کرنا چاہیے۔ اگر وہ ایسا نہیں کرتے ہیں تو مستقبل میں حملے کہیں زیادہ بڑے ہوں گے۔‘‘