امریکی بم ایران کے جوہری پروگرام کو تباہ نہیں کر پائے، خفیہ رپورٹ میں انکشاف، ٹرمپ ہوئے برہم

ایران پر امریکہ کی طرف سے کیے گئے حملوں کا کوئی خاص اثر نہیں پڑا ہے۔ یہ انکشاف حال ہی میں سامنے آئی ایک امریکی خفیہ ایجنسی کی رپورٹ میں کیا گیا۔ حالانکہ وائٹ ہاؤس نے اس رپورٹ کو یکسر خارج کر دیا ہے۔ دراصل امریکی صدر ڈونالڈ ٹرمپ نے دعویٰ کیا تھا کہ امریکہ کے حملوں نے ایران کے جوہری پروگرام کو پوری طرح سے تباہ کر دیا ہے۔

یہ رپورٹ ڈیفنس ایجنسی (ڈی آئی اے) کی ہے۔ اس رپورٹ کا خلاصہ سب سے پہلے سی این این نے کیا تھا۔ رپورٹ میں مبینہ طور پر کہا گیا ہے کہ ایران کے جوہری ٹھکانوں کو صرف کچھ مہینوں کے لیے پیچھے دھکیلا گیا ہے، نہ کہ پوری طرح سے ختم کیا گیا۔

حملوں کا اندازہ لگانے کے ماہرین دو لوگوں نے سی این این سے بات چیت میں بتایا کہ ایران کا یورینیم ذخیرہ تباہ نہیں ہوا ہے۔ ان میں سے ایک کا کہنا ہے کہ سینٹری فیوجز اب بھی موجود ہیں۔ انہوں نے کہا کہ ڈی آئی اے کا اندازہ ہے کہ امریکہ نے انہیں زیادہ سے زیادہ کچھ مہینوں کے لیے پیچھے کر دیا ہے۔ رائٹرس کی رپورٹ میں بتایا گیا ہے کہ ایران کے یورینیم کا کم سے کم کچھ حصہ امریکی حملوں سے پہلے الگ الگ مقامات پر پہنچا دیا گیا تھا۔ یہ حملے 22 جون کو فوردو، نتانز اور اصفہان پر کیے گئے تھے۔

اس درمیان سوشل میڈیا پلیٹ فارم ’ٹروتھ‘ پر اپنے ایک پوسٹ میں ٹرمپ نے رپورٹ پر ردعمل ظاہر کیا ہے۔ انہوں نے برہمی کا اظہار کرتے ہوئے رپورٹ کو ’فرضی‘ قرار دیا ہے اور اسے فوجی حملے کو بدنام کرنے کی سازش بتایا ہے۔ وائٹ ہاؤس کی پریس سکریٹری کیرولن لیوٹ نے بھی اس رپورٹ کو پوری طرح سے غلط ٹھہرایا ہے اور کہا ہے کہ یہ ٹرمپ کی شبیہ کو خراب کرنے کی کوشش ہے۔

قابل ذکر ہے کہ ایران کے تین جوہری ٹھکانوں کو نشانہ بنائے جانے سے جڑی جانکاری دینے کے لیے ٹرمپ انتظامیہ کے اعلیٰ خفیہ افسر امریکی پارلیمنٹ کے اراکین کے سامنے پیش ہوں گے اور خفیہ اطلاع سمیت اصل صورتحال سے واقف کرائیں گے۔