برطانیہ کے ذریعہ اسکولی بچوں سے متعلق اٹھائے گئے 2 اقدام سرخیوں میں، بچوں کو ذہنی طور پر صحت مند رکھنے کی کوشش

برطانیہ کی حکومت نے بچوں کے سوشل میڈیا استعمال کرنے اور اسکولوں میں موبائل فون پر سخت پابندی عائد کیے جانے کا اعلان کر دیا ہے۔ اس سلسلے میں 19 جنوری 2026 کو ایک پریس ریلیز جاری کر اہم جانکاریاں دی گئیں۔ جاری بیان کے مطابق حکومت نے 2 اہم اقدام اٹھائے ہیں، جو بچوں کی صحت اور پڑھائی کو بہتر بنانے کے لیے ہیں۔ یہ 2 اقدامات اب سرخیوں میں ہیں اور اس پر مباحثے بھی شروع ہو چکے ہیں۔

پہلا معاملہ اسکولوں میں موبائل فون پر پابندی سے متعلق ہے۔ حکومت نے صاف طور پر کہا ہے کہ اسکول ’فون فری‘ ہونے چاہئیں۔ یعنی کلاس، بریک، لنچ ٹائم یا کسی بھی وقت بچوں کو فون استعمال نہیں کرنا چاہیے۔ بیشتر اسکولوں میں پہلے سے ہی ’نو فون پالیسی‘ ہے، لیکن اب ’آف اسٹیڈ‘ (اسکولوں کی جانچ کرنے والی سرکاری ایجنسی) ہر انسپیکشن میں جانچ کرے گی کہ پالیسی ٹھیک طرح سے نافذ ہو رہی ہے یا نہیں۔ جو اسکول مشکلات کا سامنا کر رہے ہیں، انھیں خصوصی مدد دی جائے گی۔ ایجوکیشن سکریٹری بریجیٹ فلپسن نے اس تعلق سے کہا کہ اسکولوں میں موبائل کا کوئی کام نہیں، اس سلسلے میں کوئی بہانہ نہیں چلے گا۔

دوسرا قدم سوشل میڈیا سے جڑا ہوا ہے۔ حکومت ایک بڑا کنسلٹیشن (عوام سے رائے طلب کرنے کا پروگرام) شروع کر رہی ہے۔ اس کے ذریعہ پتہ کیا جائے گا کہ بچوں کے لیے سوشل میڈیا کی مناسب کم از کم عمر کیا ہونی چاہیے۔ یہ بھی غور کیا جا رہا ہے کہ کیا کسی خاص عمر (مثلاً 16 سال) سے کم عمر کے بچوں کے لیے سوشل میڈیا پوری طرح سے ممنوع کر دینا چاہیے، جیسا کہ آسٹریلیا میں کیا گیا ہے۔

بتایا جا رہا ہے کہ سوشل میڈیا سے متعلق کوئی بھی حتمی فیصلہ لینے سے قبل کنسلٹیشن کے دوران کچھ اہم سوالات پوچھے جائیں گے، جو اس طرح ہیں:

1. عمر کی جانچ کس طرح کی جا سکتی ہے، تاکہ بچے جھوٹ بول کر اکاؤنٹ نہ بنا سکیں؟

2. کیا موجودہ ڈیجیٹل عمر کی حد (ڈیجیٹل ایج آف کنسنٹ) بہت کم ہے؟

3. سوشل میڈیا ایپس میں وہ فیچرس بند یا محدود کرنے چاہئیں جو عادت لگاتے ہیں، مثلاً انفنیٹ اسکرالنگ (اسکرال کرتے رہنے کی عادت)، اسٹریکس (روز چیک اِن کا سسٹم) وغیرہ؟

4. والدین کو مزید مدد کس طرح مل سکتی ہے، مثلاً آسان پیرینٹل کنٹرول یا اسکرین ٹائم کی گائیڈلائنس؟

ٹیکنالوجی سکریٹری لز کینڈل کا کہنا ہے کہ آن لائن سیفٹی ایکٹ سے قبل ہی کافی کچھ بہتری ہوئی ہے، لیکن والدین اب بھی فکر مند ہیں۔ اس کو پیش نظر رکھتے ہوئے مزید قدم اٹھانے کی ضرورت ہے۔ انھوں نے کہا کہ حکومت پورے ملک میں میٹنگیں کرے گی، جہاں والدین، بچے اور سماج کے لوگ اپنی رائے دیں گے۔ گرمیوں تک اس سلسلے میں جواب آ جانے کی امید ہے۔ یہ سب اس لیے کیا جا رہا ہے، کیونکہ حکومت مانتی ہے کہ زیادہ اسکرین ٹائم بچوں کی پڑھائی، توجہ، دوستی اور ذہنی صحت پر برا اثر ڈال رہا ہے۔ ساتھ ہی 5 سے 16 سال کے بچوں کے والدین کے لیے اسکرین ٹائم کی نئی گائیڈلائن بھی جلد آئے گی۔