ٹیرف نے امریکہ کو مذاکرات کی زبردست طاقت دی ہے: ٹرمپ

امریکی صدر ڈونالڈ ٹرمپ نے تجارت کے معاملے پر ایک بار پھر ہندوستان کو نشانہ بنایا ہے۔ا سکاٹ جیننگز کے ریڈیو شو میں گفتگو کے دوران ٹرمپ نے کہا کہ ہندوستان نے تمام ٹیرف ختم کرنے کی پیشکش کی تھی لیکن یہ ٹیرف لگانے کے بعد ہی ممکن ہوا۔ انہوں نے دعویٰ کیا کہ اگر وہ یہ قدم نہ اٹھاتے تو ہندوستان کبھی بھی ایسی پیشکش نہ کرتا۔

ٹرمپ نے ہندوستان کو دنیا میں سب سے زیادہ ٹیرف لگانے والا ملک قرار دیا۔ انہوں نے کہا، 'چین ہم پر ٹیرف لگاتا ہے، ہندوستان ہم پر ٹیرف لگاتا ہے، برازیل ہم پر ٹیرف لگاتا ہے۔ میں نے ٹیرف کو کسی بھی انسان سے بہتر سمجھا ہے۔' ٹرمپ کا کہنا ہے کہ ٹیرف نے امریکہ کو مذاکرات کی زبردست طاقت دی ہے۔

ہندوستان اور امریکہ کے درمیان کشیدگی میں مزید اضافہ ہوا جب ٹرمپ انتظامیہ نے ہندوستان پر 25 فیصد محصولات عائد کیے اور بعد میں اسے دگنا کرکے 50 فیصد کر دیا۔ اس کی ایک بڑی وجہ ہندوستان کا روس سے تیل کی مسلسل خریداری تھی۔ ٹرمپ چاہتے تھے کہ ہندوستان روس سے تیل خریدنا بند کر دے لیکن ہندوستان نے صاف انکار کر دیا۔ ہندوستان نے کہا کہ اس کے فیصلے مارکیٹ کے حالات اور عوامی مفاد پر مبنی ہیں۔

ہندوستان نے واضح کیا ہے کہ تجارت پر بات چیت جاری ہے۔ وزیر تجارت پیوش گوئل نے کہا کہ امریکہ کے ساتھ اختلافات کو دور کرنے کی کوشش کی جا رہی ہے اور نومبر تک دو طرفہ تجارتی معاہدہ ممکن ہے۔ ساتھ ہی وزیر اعظم نریندر مودی نے واضح کیا کہ ہندوستان گھریلو ترجیحات پر کوئی سمجھوتہ نہیں کرے گا۔

ٹرمپ نے ایک بار پھر ہارلے ڈیوڈسن موٹر سائیکلوں کا معاملہ اٹھایا۔ انہوں نے کہا کہ ہندوستان نے اس برانڈ پر اتنی زیادہ  ڈیوٹی عائد کی تھی جس کی وجہ سے کمپنی کو مقامی طور پر پلانٹ لگانا پڑا۔ ٹرمپ کا استدلال ہے کہ اس طرح کے محصولات امریکی کمپنیوں کو ہندوستان میں سرمایہ کاری کرنے سے روکتے ہیں۔