رکسول: ستیہ گرہ ایکسپریس کے سلیپر کوچ میں پھندے سے لٹکی نوجوان کی لاش برآمد، تحقیقات جاری

رکسول ریلوے جنکشن پر واقع واشنگ پِٹ میں کھڑی ’ستیہ گرہ ایکسپریس‘ کے سلیپر کوچ (ایس-5) میں جمعہ (13 فروری) کو ایک نوجوان کی لاش پھندے سے لٹکی ہوئی ملی۔ حالانکہ یہ معاملہ خودکشی کا ہے یا قتل کا تحقیقات کے بعد ہی پتہ چلے گا۔ واقعہ کے بعد محکمہ ریلوے میں کھلبی مچ گئی ہے۔ فوری طور پر سینئر افسران کو اس کے متعلق اطلاع دی گئی۔

ہندی نیوز پورٹل ’اے بی پی نیوز‘ پر شائع خبر کے مطابق ستیہ گرہ ایکسپریس (ٹرین نمبر 15273) صفائی اور رکھ رکھاؤ کے لیے واشنگ پِٹ میں کھڑی تھی۔ اسی دوران ریلوے ملازمین کی نظر کوچ نمبر ایس-5 میں پھندے سے لٹکے نوجوان پر گئی۔ اب تک نوجوان کی شناخت نہیں ہو پائی تھی۔ دیکھنے سے اس کی عمر 20-19 سال کے آس پاس لگ رہی تھی۔

موقع پر موجود لوگوں کو مطابق نوجوان کے گلے پر چوٹ کے نشان نظر آ رہے تھے۔ رپورٹ کے مطابق رکسول پہنچنے کے بعد ٹرین کو صاف صفائی کے لیے واشنگ پِٹ پر کھڑا کیا گیا تھا۔ آج ٹرین کو دوبارہ دہلی روانہ کرنے کی تیاری کی جا رہی تھی۔ اسی دوران کوچ سے یہ لاش برآمد ہوئی، جس کے بعد کہرام مچ گیا۔

واقعہ کی اطلاع ملتے ہی بیتیا کے ڈی ایس آر پی نے جائے وقوعہ کا معائنہ کیا۔ معاملے کی سائنسی تحقیقات کے لیے ایف ایس ایل (فارنزک سائنس لیبارٹری) کی ٹیم کو بھی بلایا گیا۔ ٹیم نے موقع سے شواہد اکٹھے کیے۔ اب تحقیقات کے بعد ہی سب کچھ واضح ہو سکے گا۔ فی الحال اس معاملے میں مزید کارروائی شروع کر دی گئی ہے۔

واقعہ کے متعلق رکسول جی آر پی پولیس اسٹیشن کے سربراہ پون کمار نے بتایا کہ لاش کو پوسٹ مارٹم کے لیے بھیج دیا گیا ہے۔ نوجوان کی شناخت کی کوشش جاری ہے۔ گردن پر ملے زخموں کے نشان اور جائے وقوعہ کی صورتحال کو دیکھتے ہوئے پولیس معاملے کی مختلف زاویے سے تحقیقات کر رہی ہے۔ پوسٹ مارٹم رپورٹ آنے کے بعد ہی صورتحال واضح ہو سکے گی۔