’کچھ لوگ بہت بہادر بن رہے تھے، اب وہ ہلاک ہو چکے ہیں‘، اسرائیلی حملہ کے بعد ٹرمپ نے ایران کو دھمکایا

اسرائیل کے ذریعہ ایران کے جوہری تنصیبات اور کئی فوجی ٹھکانوں پر کیے گئے حملے میں کم از کم 20 سینئر کمانڈر اور سائنسداں ہلاک ہو چکے ہیں۔ اس حملہ سے ایران انتہائی ناراض ہے اور اسرائیل کو اس حرکت کا خمیازہ بھگتنے کو تیار رہنے کی تنبیہ دے دی ہے۔ اس درمیان امریکی صدر ڈونالڈ ٹرمپ نے ایران کے خلاف ہی دھمکی آمیز رویہ اختیار کر لیا ہے۔ خبر رساں ایجنسی اے پی کے مطابق ٹرمپ نے کہا ہے کہ اگر ایران نے جلد سمجھوتہ نہیں کیا تو حملے مزید سخت اور تباہ کن ہوں گے۔

امریکی صدر ڈونالڈ ٹرمپ نے سوشل میڈیا پلیٹ فارم ’ایکس‘ پر اسرائیل-ایران تنازعہ پر اپنا رد عمل ظاہر کرتے ہوئے لکھا ہے کہ ’’میں نے ایران کو بار بار سمجھوتے کے مواقع دیے۔ انھیں سخت الفاظ میں سمجھایا کہ معاہدہ کر لو، لیکن وہ کر نہیں پائے۔ میں نے صاف کہا تھا کہ امریکہ کے پاس دنیا کی سب سے خطرناک فوجی طاقت ہے، اور اسرائیل کے پاس بڑی تعداد میں اسلحے ہیں، اور وہ جانتے ہیں انھیں کیسے استعمال کرنا ہے۔‘‘ ٹرمپ کا دعویٰ ہے کہ ایران کے سخت گیر لیڈران نے پہلے بہادری دکھائی، لیکن وہ سب اب ہلاک ہو چکے ہیں، اور یہ صرف شروعات ہے۔ امریکی صدر نے مزید کہا کہ اگر اب بھی سمجھوتہ نہیں ہوا تو اگلے حملے مزید خطرناک ہوں گے۔

ڈونالڈ ٹرمپ نے ایران کے خلاف دھمکی آمیز رویہ اختیار کرتے ہوئے کہا کہ اب بھی وقت ہے، یہ نسل کشی رک سکتی ہے۔ ایران کو ایک معاہدہ کرنا ہوگا، ورنہ جو کبھی ’ایرانی سلطنت‘ کے نام سے جانا جاتا تھا، وہ پوری طرح مٹ سکتا ہے۔ مزید کوئی ہلاکت نہیں، مزید کوئی تباہی نہیں، بس سمجھوتہ کر لو، اس سے پہلے کہ بہت تاخیر ہو جائے۔ ٹرمپ کے اس بیان کے بعد مغربی ایشیا میں کشیدگی مزید بڑھنے کا اندیشہ ظاہر کیا جا رہا ہے۔ یہ بیان اسرائیلی وزیر اعظم نیتن یاہو کے ’ایران سے جنگ کے لیے تیار‘ والے بیان کے بعد آیا ہے۔ اس سے اشارہ ملتا ہے کہ یہ علاقہ میں شدید جنگ کی طرف بڑھ سکتا ہے۔

قابل ذکر ہے کہ اسرائیلی وزیر اعظم بنجامن نیتن یاہو نے روسی خبر رساں ایجنسی ’ٹی اے ایس ایس‘ کو دیے گئے ایک انٹرویو میں کہا ہے کہ ایران کے ساتھ مکمل جنگ کے لیے اسرائیل پوری طرح تیار ہے۔ ’اسکائی نیوز عربیہ‘ اور ’شفقنا‘ نیوز ایجنسی کی رپورٹ کے مطابق نیتن یاہو نے یہ بیان عالمی کشیدگی کے درمیان دیا ہے۔ اس درمیان اسرائیلی دفاعی ذرائع کا کہنا ہے کہ اگر ایران کے ساتھ جنگ شروع ہوتی ہے تو یہ کئی ہفتوں تک چل سکتی ہے۔

دوسری طرف اقوام متحدہ نے ایران پر اسرائیلی حملے پر فکر کا اظہار کیا ہے۔ اس نے دونوں ممالک کو صبر سے کام لینے کے لیے کہا ہے، تاکہ حالات مزید کشیدہ نہ ہوں۔ روس اور چین نے بھی اسرائیلی کارروائی کی تنقید کرتے ہوئے ایران کے ساتھ یکجہتی کا مظاہرہ کیا ہے۔ علاقائی ماہرین کا ماننا ہے کہ اسرائیلی حملہ صرف ایک فوجی رد عمل نہیں ہے، بلکہ مستقبل کے لیے سنگین جنگ کا اشارہ ہے۔ اس حملے کے بعد مغربی ایشیا میں فوجی کشیدگی زیادہ بڑھنے کا اندیشہ ظاہر کیا جا رہا ہے۔