روس یوکرین کے ساتھ بلاشرط مذاکرہ کے لیے تیار، پھر بھی امریکی صدر ٹرمپ کو کیوں ہو رہا شبہ؟

طویل مدت سے جاری روس-یوکرین جنگ کو ختم کرنے کی کوششیں کئی بار ہوئیں، لیکن اب تک اس میں کامیابی حاصل نہیں ہوئی ہے۔ ولادمیر پوتن کے ذریعہ جنگ بندی سے متعلق تازہ بیان نے ایک بار پھر امید جگائی ہے اور جنگ بند ہونے کا دروازہ کھلا ہے۔ پوتن نے کہا ہے کہ وہ بلاشرط یوکرین کے ساتھ بات چیت کے لیے راضی ہیں۔ کریملن نے 26 اپریل کو ایک بیان میں کہا کہ روس نے یوکرین کے ساتھ بغیر کسی پیشگی شرط کے امن مذاکرہ کرنے کی خواہش ظاہر کی ہے۔

اس سے قبل روسی صدر ولادمیر پوتن نے امریکہ کے سفیر اسٹیو وِٹکاک سے ملاقات کی تھی۔ کریملن کے ترجمان دمتری پیسکوف نے اس تعلق سے کہا کہ ’’ٹرمپ کے سفیر وِٹکاف کے ساتھ کل کی بات چیت کے دوران ولادمیر پوتن نے دہرایا کہ روس بغیر کسی پیشگی شرط کے یوکرین کے ساتھ مذاکرہ پھر سے شروع کرنے کے لیے تیار ہے۔‘‘ انھوں نے مزید کہا کہ پوتن نے ماضی میں بھی کئی بار یہ بات دہرائی ہے۔

قابل ذکر بات یہ ہے کہ امریکی صدر ٹرمپ نے 25 اپریل کو کہا تھا کہ روس-یوکرین جنگ ختم کرنے کے لیے سمجھوتہ قریب ہے۔ ایسا کہنے کے ٹھیک ایک دن بعد، یعنی 26 اپریل کو ریپبلکن لیڈر نے جنگ ختم کرنے سے متعلق پوتن کی خواہش پر شبہ ظاہر کر دیا ہے۔ ٹرمپ نے سوشل میڈیا پلیٹ فارم ’ٹروتھ‘ پر ایک پوسٹ میں لکھا ہے کہ ’’گزشتہ کچھ دنوں میں پوتن کی طرف سے شہری علاقوں، شہروں اور قصبوں میں میزائلیں داغنے کی کوئی وجہ نہیں تھی۔‘‘

سوشل میڈیا پوسٹ میں ٹرمپ نے یہ بھی لکھا ہے کہ ’’پوتن کی کارروائی سے مجھے لگتا ہے کہ شاید وہ جنگ کو روکنا نہیں چاہتے ہیں، وہ صرف مجھے بہکا رہے ہیں اور انھیں ’بیکنگ‘ یا ’سیکنڈری سینکشنز‘ کے ذریعہ الگ طریقے سے نمٹنا ہوگا؟ بہت سارے لوگ مر رہے ہیں!!!‘‘ پوپ فرانسس کی آخری رسومات کے بعد واپس امریکہ لوٹتے وقت ٹرمپ نے روس کے خلاف مزید پابندی لگانے کا اشارہ بھی دیا۔