اسرائیل عام شہریوں کا بہا رہا ہے خون، قتل عام کو روکنے کی ایرانی وزارت صحت کی دنیا سے اپیل

اسرائیل اور ایران کے درمیان جاری جنگ سے بڑی تباہی مچی ہے۔ اسرائیل کے حملوں میں بڑی تعداد میں بے قصور ایرانی شہریوں کی جانیں تلف ہوئی ہیں۔ ایران کی وزارت صحت نے اطلاع دی ہے کہ صیہونی فوج کے حملوں میں یہاں تین دن میں 224 لوگ جاں بحق ہوئے ہیں وہیں 1200 سے زیادہ افراد زخمی ہیں۔

وزارت صحت کے ترجمان حسین نے ’ایکس‘ پر لکھا ہے کہ 224 خواتین، مرد اور بچوں کو شہادت ملی ہے۔ انہوں نے کہا کہ اسرائیلی حملوں میں جو لوگ بھی مارے گئے ہیں ان میں 90 فیصد عام شہری ہیں۔ جبکہ اسرائیل کا یہ کہنا ہے کہ اس کا نشانہ صرف فوج ہے اور ایرانی عوام سے اس کا کوئی واسطہ نہیں ہے، پوری طرح سے جھوٹ ہے۔

انہوں نے کہا کہ بطور ایک ڈاکٹر میں دنیا کے تمام لوگوں سے اپیل کرتا ہوں کہ اس قتل عام کو روکا جائے۔ حسین نے آگے لکھا کہ میں ملک کے صحت اہلکاروں کی طویل عمری کی دعا کرتا ہوں۔ یہ لوگ دن رات عوام کی خدمت میں لگے ہوئے ہیں۔

اس درمیان ایران کے ریولیوشنری گارڈ نے بتایا ہے کہ انٹلی جنس چیف محمد کاظمی اور دو دیگر جنرل بھی اسرائیلی حملوں میں مارے گئے ہیں۔ اس کے علاوہ کئی دیگر اعلیٰ فوجی افسر اور جوہری سائنس داں بھی حملوں کے شکار ہوئے ہیں۔ دوسری طرف اسرائیل نے دعویٰ کیا ہے کہ جمعہ سے ابھی تک اس کے یہاں 14 لوگ مارے گئے ہیں جبکہ 390 زخمی ہوئے ہیں۔

وہیں ایرانی فوج نے اسرائیل کے لوگوں کے لیے وارننگ جاری کی ہے۔ ایرانی مسلح افواج کے ترجمان کرنل رضا سید نے کہا کہ اسرائیل کے لوگ قبضے والے علاقے کو چھوڑ دیں۔ مستقبل میں یہ یقینی طور سے رہنے کے لائق نہیں رہیں گے۔ انہوں نے آگے کہا کہ کسی بھی طرح کا شیلٹر سیکوریٹی کی گارنٹی نہیں ہے۔

اس سے پہلے اتوار کو وزیر اعظم بنجامن نیتن یاہو نے ایران کو انتباہ کرتے ہوئے کہا تھا کہ اسرائیل میں شہریوں کو نشانہ بنانے کی بھاری قیمت چکانی پڑے گی۔ یاہو نے یہ تبصرہ تیل ابیب کے نزدیک ایک شہر میں صبح صبح ایرانی میزائل حملوں کے مقام کا دورہ کرتے ہوئے کیا۔ اسرائیلی وزیر اعظم کے دفتر کے ذریعہ نیتن یاہو کے حوالے سے جاری بیان میں کہا گیا کہ ایران کو شہریوں، خواتین، بچوں کے قتل کے لیے بڑی قیمت چکانی پڑے گی جسے اس نے جان بوجھ کر انجام دیا ہے۔

واضح رہے کہ جمعہ کی صبح ’ااپریشن رائزنگ لائن‘ شروع ہوا۔ اس میں اسرائیل نے ایران کے جوہری، میزائل اور دیگر ڈھانچے کو نشانہ بنایا۔ بعد میں ایران نے اسرائیل کا منھ توڑ جواب دیتے ہوئے اس پر زبردست حملے شروع کیے۔ اس کے نتیجے میں دونوں جانب کشیدگی بڑھتی جا رہی ہے اور عوام کو کافی نقصان کا سامنا کرنا پڑ رہا ہے۔