’حملہ کیا تو امریکی فوج کے ساتھ ساتھ اسرائیل بھی بنے گا نشانہ‘، ٹرمپ کی دھمکی سے ناراض ہوا ایران

ایران کی پارلیمنٹ کے اسپیکر محمد باقر قالیباف نے اتوار کو سخت انداز میں خبردار کیا کہ اگر امریکی صدر ڈونالڈ ٹرمپ کی دھمکی کے بعد اسلامی جمہوریہ پر حملہ ہوتا ہے تو اسرائیل کے ساتھ ساتھ امریکی فوج بھی نشانے پر لیے جائیں گے۔ محمد باقر قالیباف کے اس بیان سے اشارہ ملتا ہے کہ انہوں نے ایران پر حملے کے بعد ممکنہ اہداف کی فہرست میں اسرائیل کو بھی شامل کیا ہے۔

سخت گیر رہنما قالیباف نے یہ دھمکی اس وقت دی جب ایرانی پارلیمنٹ میں اراکین ’امریکہ مردہ باد‘ کا نعرہ لگاتے ہوئے اسٹیج پر چڑھ گئے۔ قابل ذکر ہے کہ امریکی صدر ڈونالڈ ٹرمپ نے ایران کے لیے اپنی منصوبہ بندی کے بارے میں ایک بڑا اشارہ دیا ہے۔ امریکی فوج نے اتوار کو انہیں ایران پر حملہ کے ممکنہ اختیارات کے بارے میں آگاہ کیا۔ اسی کو پیش نظر رکھتے ہوئے محمد باقر قالیباف کا ایک واضح اور دھمکی آمیز بیان سامنے آیا ہے۔

خبر رساں ایجنسی رائٹر کی رپورٹ کے مطابق ایران پر امریکہ کے ممکنہ حملہ کے خدشہ کے پیش نظر اسرائیل ہائی الرٹ پر ہے۔ رپورٹ میں اس تعلق سے جانکاری ہفتہ کے آخر میں اسرائیلی سیکورٹی اجلاس میں شریک 3 افراد کے حوالہ سے دی گئی ہے۔ دعویٰ کیا گیا ہے کہ اسرائیل ایران میں امریکہ کی جانب سے ممکنہ کارروائی کی تیاری کر رہا ہے۔

ایک ذرائع نے خبر رساں ایجنسی کو بتایا کہ ہفتہ کو فون پر ہونے والی گفتگو کے دوران اسرائیلی وزیر اعظم بنجامن نیتن یاہو اور امریکی وزیر خارجہ مارکو روبیو نے ایران میں امریکی مداخلت کے امکان پر بات کی۔ وہیں ڈیلی میل کی رپورٹ کے مطابق ڈونالڈ ٹرمپ نے اتوار کو امریکی فوج کو گرین لینڈ پر ممکنہ حملہ کے لیے ہنگامی منصوبہ تیار کرنا شروع کرنے کی ہدایت دی۔ تاہم، ٹرمپ کی اس ہدایت پر اعلیٰ فوجی حکام کی جانب سے مخالفت سامنے آئی۔ انہوں نے اس کی قانونی حیثیت اور سیاسی سلوک، دونوں پر سوال اٹھائے۔