ایپسٹین فائلز پر سیاست گرم، ہلیری کلنٹن نے ٹرمپ انتظامیہ پر کور اپ کا الزام لگایا

امریکہ کی سابق وزیر خارجہ ہلیری کلنٹن نے کہا ہے کہ ڈونالڈ ٹرمپ انتظامیہ ایپسٹین فائلز کے معاملے میں لیپا پوتی کی کوشش کر رہی ہے۔ ہلیری کلنٹن نے بی بی سی سے گفتگو میں کہا کہ عوام کو اس معاملے سے متعلق تمام مواد دیکھنے کا حق ہے۔ انہوں نے الزام لگایا کہ دستاویزات جاری کرنے کا عمل سست کیا جا رہا ہے ۔ مکمل شفافیت برتی جانی چاہیے۔

وائٹ ہاؤس نے کلنٹن کے الزامات کو مسترد کرتے ہوئے کہا کہ انتظامیہ نے غیر معمولی شفافیت دکھائی ہے اور ہزاروں صفحات پر مشتمل دستاویزات جاری کئے ہیں۔ قابلِ ذکر ہے کہ اس ماہ کے آغاز میں امریکی محکمۂ انصاف نے 'ایپسٹین فائلز ٹرانسپیرنسی ایکٹ' منظور ہونے کے بعد لاکھوں نئے دستاویزات جاری کیں۔ تاہم نائب اٹارنی جنرل نے بتایا کہ تقریباً 30 لاکھ اضافی صفحات حساس طبی ریکارڈ، بچوں کے استحصال سے متعلق تفصیلات اور جاری تحقیقات سے جڑی معلومات کی وجہ سے روکے گئے ہیں۔

واضح رہے کہ مرحوم سرمایہ کار اور سزا یافتہ جنسی مجرم جیفری ایپسٹین سے متعلق تفتیشی فائلوں کے عام ہونے کے بعد امریکہ میں ڈیموکریٹس اور برسرِ اقتدار ریپبلکن پارٹی کے درمیان سیاسی کشیدگی بڑھ گئی ہے۔ ان فائلوں میں دونوں جماعتوں کی کئی بااثر شخصیات کے نام سامنے آئے ہیں، تاہم کسی فائل میں نام کا ذکر ہونا بذاتِ خود کسی غلط کام کا ثبوت نہیں سمجھا جاتا۔

کینٹکی کے ریپبلکن رکن کانگریس تھامس میسی نے محکمۂ انصاف سے ایپسٹین اور اس کے ساتھیوں کے خلاف سابق استغاثہ فیصلوں سے متعلق اندرونی یادداشتیں جاری کرنے کا مطالبہ کیا ہے۔