’خبردار اگر جوہری تجربہ کے بارے میں سوچا بھی‘، روس نے امریکہ سمیت سبھی جوہری ممالک کو دی دھمکی

دنیا بھر میں اس وقت افراتفری کا ماحول ہے۔ ہر طرف جنگ اور کشیدگی کا دور جاری ہے۔ اس درمیان روس نے جوہری تجربہ کے بارے میں سوچ رہے ممالک کو براہ راست دھمکی دی ہے۔ روس کے نائب وزیر خارجہ سرگئی ریابکوف نے کہا ہے کہ اگر کوئی ملک جوہری تجربہ کرنے کا غلط اور غیر مستحکم فیصلہ لیتا ہے تو ہم اس کا منہ توڑ جواب دیں گے۔ اس دوران روس نے اشاروں ہی اشاروں میں امریکہ کو ہدف تنقید بھی بنایا۔

روسی نائب وزیر خارجہ نے کہا کہ امریکہ طویل عرصہ سے جوہری تجربوں کے لیے ضروری بنیادی ڈھانچوں کو جنگی حالات میں رکھتا آ رہا ہے۔ میں زور دے کر یہ دہرانا چاہوں گا کہ امریکہ طویل عرصہ سے اس طرح کے مقاصد کے لیے اپنے بنیادی ڈھانچے کو تیار رکھتا ہے۔ کچھ وقت قبل ہم نے اس پر دھیان دیا تھا، یہ تب ہوا جب ہم نے نیو اسٹریٹیجک آرمس ریڈکشن ٹریٹی پر فیصلہ لیا تھا۔

سرگئی ریابکوف کا کہنا ہے کہ اگر جوہری صلاحیت رکھنے والا کوئی بھی ملک غلط فیصلہ لیتا ہے تو فوری طور پر جوابی کارروائی کریں گے۔ انھوں نے واضح لفظوں میں کہا کہ ’’امریکہ پر ہماری گہری نظر ہے۔‘‘ واضح ہو کہ اس سے قبل روسی صدر پوتن نے والدائی انٹرنیشنل ڈسکشن کلب میں کہا تھا کہ ’’ہمارے علم میں یہ بات آئی ہے کہ کوئی جوہری ہتھیار کے تجربے کی بات کر رہا ہے اور اگر ایسا ہوا تو ہم جوابی کارروائی کریں گے۔‘‘

ظاہر ہے، اب روس نے جوہری تجربہ کو لے کر واضح طور پر تنبیہ جاری کر دی ہے۔ روس کا کہنا ہے کہ اگر کوئی بھی ملک جوہری تجربہ کرنے کی سمت میں قدم اٹھاتا ہے تو اسے اس کا خمیازہ بھگتنا پڑے گا۔ ویسے بھی یوکرین جنگ کو لے کر روس اور امریکہ کے تعلقات ان دنوں بہتر نہیں ہیں، اس لیے روس کا بیان تشویش ناک ہے۔ امریکی صدر ٹرمپ چاہتے ہیں کہ روس جلد از جلد یوکرین کی جنگ ختم کر دے، لیکن روس اپنی شرطوں پر جنگ کا خاتمہ چاہتا ہے۔ ٹرمپ مسلسل روس پر دباؤ بنا رہے ہیں، لیکن روس کسی بھی قیمت پر جھکنے کے لیے تیار نہیں ہے۔