سب کی نظریں الاسکا میں ٹرمپ-پوتن کی ملاقات پر!

امریکی صدر ڈونالڈ ٹرمپ اور روسی صدر ولادی میر پوتن الاسکا میں ملاقات کرنے والے ہیں۔ یہ میٹنگ ہندوستانی وقت کے مطابق 15-16 اگست کی رات تقریباً ایک بجے شروع ہوگی۔ ملاقات کا آغاز ٹرمپ اور پوتن کے درمیان مترجمین کی موجودگی میں ون آن ون بات چیت سے ہوگا۔ اس کے بعد دونوں ممالک کے وفود کے درمیان مذاکرات ہوں گے جو ناشتے کے دوران جاری رہیں گے۔ روسی وفد میں وزیر خارجہ سرگئی لاوروف، صدارتی مشیر یوری اوشاکوف، وزیر دفاع بیلوسوف، وزیر خزانہ سلوانوف اور خصوصی ایلچی دمتریوف شامل ہوں گے۔

سی این این کی رپورٹ کے مطابق امریکی صدر ڈونالڈ ٹرمپ نے کہا کہ انہیں یقین ہے کہ روسی صدر ولادی میر پوتن جمعہ کو الاسکا میں ہونے والی ملاقات میں یوکرین جنگ کے خاتمے کے لیے کسی معاہدے تک پہنچنے کے ارادے سے آئیں گے۔ فاکس ریڈیو سے گفتگو کرتے ہوئے ٹرمپ نے کہا کہ’ مجھے لگتا ہے کہ اب وہ  پراعتماد ہیں کہ وہ معاہدہ کر لیں گے۔ وہ ایک سودا کرنے جا رہا ہے۔ مجھے لگتا ہے کہ یہ ڈیلہونے والی ہے ، اور مجھے بہت جلد پتہ چل جائے گا۔‘

وائٹ ہاؤس نے اس سے قبل اس ملاقات کو محض 'سننے کی مشق' کہہ کر توقعات کو کم کرنے کی کوشش کی تھی، لیکن ٹرمپ نے اس کے بارے میں توقعات بڑھا دی ہیں۔ انہوں نے یہ اشارہ بھی دیا کہ ان کا مقصد یوکرین کے صدر زیلنسکی کے ساتھ سہ فریقی ملاقات کی طرف بڑھنا ہے۔ ٹرمپ نے واضح کیا کہ وہ ملاقات کے نتائج کی بنیاد پر مزید اقدامات کریں گے۔ انہوں نے کہا کہ ملاقات خراب ہوئی تو کسی کو نہیں بلاؤں گا، سیدھا گھر جاؤں گا۔ لیکن اگر یہ اچھا ہے تو میں صدر زیلنسکی اور یورپی رہنماؤں کو فون کروں گا۔

جب ان سے پوچھا گیا کہ کیا وہ ملاقات میں روس کو اقتصادی مراعات دیں گے تو ٹرمپ نے ظاہر کرنے سے انکار کردیا۔ انہوں نے کہا کہ میں اپنے کارڈز کو عوامی طور پر ظاہر نہیں کرنا چاہتا ۔ادھر ٹرمپ-پوتن ملاقات کے بارے میں ہندوستان کی وزارت خارجہ کے ترجمان رندھیر جیسوال نے کہا کہ ہندوستان 15 اگست کو الاسکا میں ہونے والی ملاقات کے لیے امریکہ اور روس کے درمیان ہونے والی بات چیت کا خیرمقدم کرتا ہے۔