کملا ہیرس نے دیا صدارتی انتخاب لڑنے کا اشارہ

 امریکہ کی سابق نائب صدر کملا ہیرس نے اشارہ دیا ہے کہ وہ دوبارہ صدارتی انتخابات میں حصہ لے سکتی ہیں۔ سنیچر کے روز ایک انٹرویو کے دوران کملا ہیرس نے کہا کہ انہیں امید ہے کہ آنے والے سالوں میں ایک خاتون صدر بنے گی اور وہ یقیناً خود ایک دن امریکہ کی صدر بن سکتی ہیں۔ انہوں نے کہا کہ وہ ابھی ختم نہیں ہوئی ہیں۔

انٹرویو کے دوران جب کملا ہیرس سے پوچھا گیا کہ کیا وہ صدر بن سکتی ہیں تو انہوں نے اس کا جواب دیتے ہوئے کہا کہ ایسا ممکن ہے۔ یہ ان کا اب تک کا سب سے مضبوط اشارہ ہے کہ وہ 2028 میں دوبارہ صدارتی انتخاب لڑ سکتی ہے لیکن یہ فیصلہ ابھی حتمی نہیں ہے۔ ہندوستان نژاد کملا ہیرس نے کہا کہ وہ ممکنہ طور پر ایک دن امریکہ کی صدر بن سکتی ہیں۔ وہ پورے یقین سے کہہ سکتی ہیں کہ ایک دن وائٹ ہاوس میں ضرور کسی خاتون صدر کا داخلہ ہوگا۔

کملا ہیرس نے کہا کہ میری اننگز ابھی ختم نہیں ہوئی ہے، میں پھر سے امریکی صدارتی عہدے کی امیدوار بن سکتی ہوں۔ واضح رہے کہ کملا ہیرس گزشتہ سال ڈیمو کریٹک پارٹی کی طرف سے امریکی صدارتی انتخابات میں امیدوار تھیں اور بڑی طاقت کے ساتھ انہوں نے الیکشن بھی لڑا لیکن ریپبلکن پارٹی کے امیدوار ڈونلڈ ٹرمپ سے ہار گئی تھیں۔

کملا ہیرس نے کہا کہ وہ ابھی ختم نہیں ہوئی ہیں۔ سابق نائب صدر نے کہا کہ انہوں نے 2028 کی صدارتی مہم کے بارے میں حالانکہ ابھی کوئی فیصلہ نہیں کیا ہے، لیکن انہوں نے اس بات کو پوری طرح خارج کردیا کہ انہیں مشکلات کا سامنا کرنا پڑے گا۔

کملا ہیرس نے واضح کیا کہ وہ کبھی بھی سروے یا پولز کی بنیاد پر فیصلے نہیں کرتی ہیں۔ بتادیں کہ ڈیمو کریٹک پارٹی کی طرف سے پہلے جو بائیڈن صدارتی امیدوار تھے لیکن عمر سے متعلق مسائل کی وجہ سے وہ اس دوڑ سے دستبردار ہوگئے تھے اور ان کی جگہ کملا ہیرس کو امیدوار بنایا گیا تھا۔