2.69 لاکھ لوگوں کو مکہ میں داخل ہونے سے روکا گیا، بغیر پرمٹ حج کی کوشش کرنے والوں پر سعودی حکومت سخت

سعودی عرب میں سفر حج کو لے کر اس مرتبہ کافی سختی برتی جا رہی ہے۔ حکومت سعودی عرب نے بھی واضح کر دیا ہے کہ بغیر اجازت کوئی بھی مکہ میں قدم نہیں رکھ سکے گا۔ اسی کے تحت اب تک بغیر پرمٹ کے حج کرنے کی کوشش کر رہے 2 لاکھ 69 ہزار 678 افراد کو مکہ میں داخل ہونے سے روک دیا گیا ہے۔ افسروں نے اتوار کو اس کی تصدیق کی اور حج ضابطوں کی خلاف ورزی کرنے والوں پر بھاری جرمانہ اور کارروائی کی جانکاری دی۔

مکہ میں ذرائع ابلاغ کے نمائندوں سے بات چیت کرتے ہوئے افسروں نے بتایا کہ گزشتہ سال شدید گرمی میں مرنے والوں کی تعداد ایسے ہی بغیر اجازت آنے والوں کی تھی۔ افسروں نے آگے بتایا کہ 23000 سے زیادہ سعودی باشندوں پر بھی حج ضابطوں کی خلاف ورزی کی وجہ سے جرمانہ لگایا گیا ہے جبکہ حج سے جڑی 400 کمپنیوں کا لائسنس منسوخ کر دیا گیا ہے۔

اس سال حج میں تحفظ کو دیکھتے ہوئے پہلی بار ڈرون کا استعمال کیا جا رہا ہے۔ اس معاملے میں سعودی ڈیفنس نے کہا کہ تکنیک کا استعمال حج کو محفوظ اور منظم بنانے میں مدد کرے گا۔ وہیں لیفٹیننٹ جنرل محمد العماری نے کہا کہ ہر ایک مسافر ہماری نظر میں ہے اور جو ضابطہ توڑے گا وہ ہمارے قبضے میں ہوگا۔ فی الحال 14 لاکھ عازمین حج سرکاری طور سے مکہ پہنچ چکے ہیں اور آنے والے دنوں میں مزید لوگوں کے پہنچنے کا امکان ہے۔

واضح رہے کہ سعودی حکومت کے ضابطوں کے مطابق بغیر اجازت حج کرنے والے شخص کو 5000 امریکی ڈالر تک کا جرمانہ اور بے دخلی جیسے سخت سزا کا سامنا کرنا پڑ سکتا ہے۔