ہندوستان اور امریکہ کے درمیان 7 گھنٹوں تک چلا کاروباری معاہدہ سے متعلق مذاکرہ، جلد ہوگی اگلی میٹنگ!

ہندوستان اور امریکہ کے درمیان تجارتی معاہدہ پر منگل (16 ستمبر) کو 7 گھنٹے تک میٹنگ چلی۔ یہ میٹنگ کافی حد تک مثبت رہی اور مستقبل میں بھی ٹیرف جیسے سنجیدہ معاملہ پر بات چیت ہونے کا قوی امکان ہے۔ میٹنگ میں امریکہ کی جانب سے چیف نیگوشیئٹر برینڈن لِنچ اور ہندوستان کی جانب سے ایڈیشنل سکریٹری راجیش اگروال شریک تھے۔ میڈیا رپورٹس کے مطابق تجارتی معاہدہ کو لے کر امریکی ٹیم سے دہلی میں طویل گفتگو ہوئی۔ یہ ایک روزہ میٹنگ تھی۔ اب امریکی ٹیم واپس وطن چلی جائے گی۔ حالانکہ جلد ہی اگلی میٹنگ ہونے والی ہے۔ وزارت کامرس کی جانب سے دیے گئے بیان میں کہا گیا ہے کہ آج 7 گھنٹے تک چلی میٹنگ میں تجارتی معاہدہ کے مختلف پہلوؤں پر مثبت اور دور اندیشی پر مبنی بات چیت ہوئی۔ اس میٹنگ میں تجارتی معاہدے (بی ٹی اے) کو جلد مکمل کرنے کے لیے کوشش تیز کرنے کا فیصلہ لیا گیا ہے۔

ہندوستان اور امریکہ کے درمیان تجارتی کشیدگی کو کم کرنے کو لے کر بھی اس میٹنگ میں بات چیت ہوئی۔ دوسری جانب ہندوستان مسلسل ٹیرف کا معاملہ اٹھا رہا ہے۔ ممکن ہے کہ میٹنگ کے دوران اس معاملہ پر بھی تبادلۂ خیال کیا گیا ہوگا۔ اس کے علاوہ آئندہ میٹنگ میں ہندوستان امریکہ میں اپنی چھوٹی صنعتوں کو فروغ دینے کے تعلق سے بھی بات کر سکتا ہے۔ ممکن ہے کہ اس میٹنگ میں امریکہ کی جانب سے ہندوستانی مارکیٹ میں ایگریکلچر اور ڈیری سیکٹر کے لیے اوپین انٹری کا مطالبہ بھی شامل ہو سکتا ہے۔ واضح ہو کہ امریکہ اپنے ڈیری اور زرعی مصنوعات کو ہندوستان میں فروخت کرنا چاہتا ہے، جس کے لیے وہ مسلسل ہندوستان پر دباؤ بڑھاتا آ رہا ہے۔ ایسے میں میٹنگ میں اس معاملہ پر لازمی طور پر بات چیت ہوئی ہوگی۔

غور طلب ہے کہ ہندوستان-امریکہ دو طرفہ تجارتی معاہدے کے لیے چیف نیگوشیئٹر برینڈن لنچ کی قیادت میں امریکی تجارتی نمائندہ دفتر کے افسران کی ایک جماعت 16 ستمبر کو ہندوستان آئی تھی۔ انہوں نے محکمہ کامرس کے اسپیشل سکریٹری کی قیادت میں محکمہ کامرس کے افسران کے ساتھ ہندوستان-امریکہ دو طرفہ تجارتی معاہدہ سمیت ہندوستان-امریکہ تجارتی رشتوں پر بات چیت کی۔

قابل ذکر ہے کہ گزشتہ کچھ دنوں سے ٹیرف کو لے کر ہندوستان اور امریکہ کے رشتوں کے درمیان کشیدگی چلی آ رہی تھی۔ اس درمیان امریکی صدر ڈونالڈ ٹرمپ نے سوشل میڈیا پر ہندوستان کے تئیں نرم رخ اختیار کرتے ہوئے وزیر اعظم مودی کو قریبی دوست بتایا تھا اور ان سے ملنے کی خواہش ظاہر کی تھی۔ اس کے جواب میں وزیر اعظم نریندر مودی نے کہا کہ میں بھی امریکی صدر ڈونالڈ ٹرمپ سے ملنا چاہتا ہوں۔