دہلی-این سی آر میں سردی میں کمی، فضائی آلودگی برقرار

فروری کے آغاز کے ساتھ ہی دہلی اور اس کے اطراف کے علاقوں میں موسم کا مزاج بدلتا دکھائی دے رہا ہے۔ جنوری بھر جاری رہنے والی سخت سردی کا اثر اب بتدریج کم ہو رہا ہے اور دن کے وقت دھوپ میں تیزی آنے سے درجہ حرارت میں اضافہ درج کیا جا رہا ہے۔ دہلی کے ساتھ نوئیڈا، غازی آباد اور پورے قومی دارالحکومت خطہ میں یہ تبدیلی واضح طور پر محسوس کی جا رہی ہے۔

محکمہ موسمیات کے مطابق فروری کے پہلے ہفتے میں زیادہ سے زیادہ اور کم سے کم درجہ حرارت دونوں میں اضافہ ہوا ہے۔ پانچ فروری کو دہلی میں زیادہ سے زیادہ درجہ حرارت تقریباً 22 ڈگری سیلسیس اور کم سے کم 8 ڈگری سیلسیس ریکارڈ کیا گیا۔

آئندہ دنوں میں کم سے کم درجہ حرارت 10 سے 11 ڈگری سیلسیس کے درمیان رہنے کا امکان ظاہر کیا گیا ہے، جبکہ زیادہ سے زیادہ درجہ حرارت 23 سے 24 ڈگری سیلسیس تک پہنچ سکتا ہے۔ دن کے وقت دھوپ کے باعث ہلکی گرمی کا احساس ہونے لگا ہے، تاہم صبح اور رات کے اوقات میں خنکی برقرار رہ سکتی ہے۔

سردی میں کمی کے باوجود صبح کے وقت کہرے کی موجودگی اب بھی پریشانی کا سبب بن سکتی ہے۔ محکمہ موسمیات کے مطابق آئندہ چند دنوں تک موسم خشک رہے گا اور بعض علاقوں میں ہلکے سے درمیانے درجے کا کہرا دیکھنے کو مل سکتا ہے۔ ہوا میں نمی کا تناسب 90 سے 100 فیصد تک رہنے کی توقع ہے، جو کہرے کی بنیادی وجہ بن سکتا ہے۔ فی الحال کسی قسم کی وارننگ جاری نہیں کی گئی، تاہم صبح کے اوقات میں گاڑی چلانے والوں کو احتیاط برتنے کا مشورہ دیا گیا ہے۔

ماہرین کا کہنا ہے کہ آنے والے مہینوں میں ال نینو کے اثرات بھی نمایاں ہو سکتے ہیں، جس کے نتیجے میں درجہ حرارت معمول سے زیادہ رہنے اور بارش میں کمی کا امکان ہے۔ فروری اور مارچ کے دوران گرمی میں تدریجی اضافہ متوقع ہے اور اس کے ساتھ ہی فضائی معیار پر بھی اس کے اثرات مرتب ہو سکتے ہیں۔

دوسری جانب درجہ حرارت میں اضافے کے باوجود دہلی-این سی آر میں فضائی آلودگی بدستور تشویش کا باعث بنی ہوئی ہے۔ مختلف علاقوں میں فضائی معیار اشاریہ انتہائی خراب اور خراب زمرے میں ریکارڈ کیا گیا ہے۔ شہر کا 24 گھنٹے کا اوسط فضائی معیار اشاریہ اگرچہ پہلے کے مقابلے میں کچھ کم ہوا ہے، تاہم یہ اب بھی خراب درجہ میں شامل ہے۔ مرکزی آلودگی کنٹرول ادارے کے مطابق بیشتر نگرانی مراکز پر فضائی معیار خراب سطح پر برقرار ہے۔

ماہرین کے مطابق خشک موسم اور کم رفتار ہوائیں آلودہ ذرات کو منتشر ہونے سے روکتی ہیں، جس کے باعث اسموگ کی صورتحال پیدا ہو سکتی ہے۔ شہریوں، خصوصاً بچوں، بزرگوں اور سانس کی بیماریوں میں مبتلا افراد کو صبح کے وقت باہر نکلتے ہوئے خصوصی احتیاط اختیار کرنے کی ہدایت دی گئی ہے۔