شبھانشو شکلا انٹرنیشنل اسپیس اسٹیشن سے زمین کے لیے روانہ، کل خلائی طیارہ کی کیلیفورنیا واقع سمندر میں ہوگی لینڈنگ

ہندوستان کے خلائی مشن میں آج مزید ایک تاریخی لمحہ جڑ گیا جب ہندوستانی خلائی مسافر شبھانشو شکلا، جنھوں نے 18 دن انٹرنیشنل اسپیشل اسٹیشن (آئی ایس ایس) پر گزارے، اب زمین پر واپسی کے لیے پرواز بھر چکے ہیں۔ ’ڈریگن‘ نامی خلائی طیارہ آئی ایس ایس سے الگ ہو چکا ہے اور اس میں تھرسٹر فائرنگ محض نام کی ہے، جس سے گریس خلائی اسٹیشن سے دور چلی گئی ہے۔

اس درمیان کمانڈر پیگی وہٹسن نے ’ایکس-4 مشن‘ میں تعاون کے لیے خلائی اسٹیشن کی پائلٹ ٹیم کا شکریہ ادا کیا۔ یہ خلائی طیارہ منگل کی دوپہر تقریباً 3 بجے کیلیفورنیا کے ساحل پر لینڈ کرے گا۔ یہ مشن امریکہ اور ہندوستان سمیت ہنگری و پولینڈ کے لیے بھی خلائی دنیا میں واپسی کی علامت ہے، کیونکہ ان چاروں ممالک نے 4 دہائیوں بعد پھر سے خلا میں شراکت داری کی ہے۔

قابل ذکر ہے کہ شبھانشو شکلا اور ان کی ٹیم پیر کے روز دوپہر ’ڈریگن اسپیس کرافٹ‘ پر سوار ہوئے۔ خلائی اسٹیشن سے اَن ڈاکنگ کا عمل ہندوستانی وقت کے مطابق شام تقریباً 4.35 بجے شروع ہوا۔ اب یہ خلائی طیارہ تقریباً 22.5 گھنٹے کا سفر مکمل کرنے کے بعد منگل کی دوپہر ہندوستانی وقت کے مطابق تقریباً 3 بجے کیلیفورنیا کے سمندری ساحل میں ’اسپلیش ڈاؤن‘ ہوگا، یعنی خلائی طیارہ کی لینڈنگ ہوگی۔ یہ پورا عمل آٹومیٹیڈ ہوگا اس میں کسی مینوئل مداخلت کی ضرورت نہیں ہوگی۔

موصولہ اطلاع کے مطابق ڈریگن خلائی طیارہ جب آئی ایس ایس سے الگ ہوا تو کچھ انجن برن ہوا جس سے وہ خود کو اسٹیشن سے بہ حفاظت دوری پر لے جا سکا۔ اب یہ خلائی طیارہ زمین کی فضا میں داخل ہوگا۔ اس دوران اس کی درجہ حرارت 1600 ڈگری سلسیس تک پہنچ سکتی ہے۔ 2 مراحل میں پیراشوٹ کھلیں گے۔ پہلے 5.7 کلومیٹر کی اونچائی پر اسٹیبلائزنگ چوٹس اور پھر تقریباً 2 کلومیٹر پر ایک اہم پیراشوٹ کھلے گا۔ اس سے اسپیس کرافٹ کی محفوظ لینڈنگ ممکن ہوگی۔

واضح رہے کہ اتوار کو آئی ایس ایس پر ایکسپیڈیشن-73 مشن کے خلائی مسافروں نے ’ایکسیوم-4‘ مشن ٹیم کے لیے وداعی تقریب منعقد کیا۔ اس موقع پر شبھانشو شکلا نے کہا کہ جلد ہی زمین پر ملاقات کرتے ہیں۔ انھوں نے یہ بھی کہا کہ انھیں اس سفر کی شروعات میں اتنا کچھ تجربہ ہوگا، اس کا تصور نہیں تھا۔ یہ سفر ان کے لیے عجوبہ خیز رہا۔