روسی صدر پوتن نے ہندوستانی وزیر اعظم مودی کو کیا فون، دہشت گردی کے خلاف جنگ میں تعاون کا عزم

روس نے دہشت گردی کے خلاف جنگ میں ہندوستان کا تعاون کرنے سے متعلق اپنے عزائم کو ایک بار پھر دہرایا ہے۔ روسی صدر ولادمیر پوتن نے پیر کے روز وزیر اعظم نریندر مودی سے فون پر بات کی اور پہلگام دہشت گردانہ حملہ کی شدید الفاظ میں مذمت کی۔ وزارت خارجہ کے ترجمان رندھیر جیسوال نے اس سلسلے میں جانکاری دیتے ہوئے بتایا کہ ’’روسی صدر پوتن نے وزیر اعظم مودی کو فون کیا اور ہندوستان کے پہلگام میں ہوئے دہشت گردانہ حملے کی سخت مذمت کی۔ انھوں نے بے قصور لوگوں کی موت پر گہری ہمدردی ظاہر کی۔ ساتھ ہی انھوں نے دہشت گردی کے خلاف جنگ میں ہندوستان کو مکمل حمایت دینے کی بات کہی۔‘‘

رندھیر جیسوال نے مزید جانکاری دیتے ہوئے کہا کہ ’’پوتن نے اس بات پر زور دیا کہ اس بہیمانہ حملے کے قصورواروں اور ان کے مددگاروں کو انصاف کے کٹہرے میں لایا جانا چاہیے۔ دونوں لیڈران نے ہند-روس خصوصی اختیارات حاصل اسٹریٹجک شراکت داری کو مزید گہرا کرنے کے اپنے عزائم واضح کیے۔‘‘ وہ مزید کہتے ہیں کہ ’’وزیر اعظم (مودی) نے وکٹری ڈے کی 80ویں سالگرہ کے موقع پر (روسی) صدر پوتن کو نیک خواہشات پیش کیں اور انھیں اس سال کے آخر میں ہندوستان میں منعقد ہونے والے سالانہ اعلیٰ سطحی اجلاس کے لیے مدعو کیا۔‘‘

اس سے قبل روسی وزارت خارجہ سرگیئی لاوروف نے اتوار کو ہندوستان اور پاکستان کے درمیان بڑھتی کشیدگی پر فکر ظاہر کی تھی۔ جموں و کشمیر کے پہلگام میں ہوئے دہشت گردانہ حملے کے بعد ہند و پاک کے درمیان کشیدگی جاری ہے۔ اس درمیان روسی وزارت خارجہ نے دونوں ممالک سے صبر کرنے اور کسی بھی طرح کی سبقت کو روکنے کی اپیل کی تھی۔