اہم خبریں LIVE: گہلوت حکومت نے کنہیا لال کے دونوں بیٹوں کو ملازمت دینے کا کیا اعلان

راجستھان کی اشوک گہلوت حکومت نے ادے پور قتل معاملے میں ہلاک کنہیا لال کے دونوں بیٹوں کو سرکاری ملازمت دینے کا اعلان کیا ہے۔ راجستھان حکومت کی کابینہ میٹنگ میں اس تعلق سے قرارداد پاس ہو گیا ہے۔

کیرالہ کے ثقافتی امور اور ماہی پروری کے وزیر ساجی چیرین نے اپنے عہدے سے استعفیٰ دے دیا ہے۔ انہوں نے آئین کے حوالے سے متنازعہ بیان دیا تھا۔ تب سے ان کے استعفیٰ کا مطالبہ کیا جا رہا تھا۔

مختار عباس نقوی کے بعد آر سی پی سنگھ نے بھی مودی کابینہ سے استعفیٰ دے دیا ہے۔ دونوں ہی راجیہ سبھا کے رکن ہیں اور ان کی مدت کار 7 جولائی کو ختم ہو رہی ہے۔ مودی کابینہ میں جنتا دل یو کوٹہ سے آر سی پی سنگھ تنہا وزیر تھے۔ اس بار جنتا دل یو نے آر سی پی سنگھ کو راجیہ سبھا نہیں بھیجا، اس وجہ سے انھیں مودی کابینہ سے استعفیٰ دینا پڑا ہے۔

مرکزی وزیر برائے اقلیتی امور مختار عباسی نقوی نے مودی کابینہ سے استعفیٰ دینے کا اعلان کر دیا ہے۔ مختار عباس نقوی راجیہ سبھا کے رکن ہیں اور ان کی مدت کار 7 جولائی کو ختم ہو رہی ہے۔ اسی کے پیش نظر انھوں نے اپنا استعفیٰ دے دیا ہے۔ قابل ذکر ہے کہ اس بار بی جے پی نے انھیں راجیہ سبھا نہیں بھیجا ہے، اور انھیں گزشتہ دنوں ہوئے لوک سبھا کے ضمنی انتخابات میں بھی میدان میں نہیں اتارا گیا۔

نیپال کے وزیر خزانہ جناردن شرما نے بدھ کے روز عوامی احتجاج اور بڑے پیمانے پر تنقید کے بعد استعفیٰ دے دیا۔ کھٹمنڈو پوسٹ کے مطابق ان پر بجٹ کے نظم و ضبط کی خلاف ورزی کا الزام عائد کیا گیا ہے۔ ماہرین کا کہنا ہے کہ انہوں نے مالیاتی جرم کیا ہے۔ دراصل، جناردن شرما نے پارلیمنٹ میں بجٹ پیش کرنے سے ایک دن قبل 28 مئی کو ٹیکس کی شرحوں میں ترمیم کے لیے دو غیر مجاز افراد کو ملازمت دی تھی۔

پنجاب کے وزیر اعلیٰ بھگونت مان کل کو شاندی کے بندھن میں بندھنے جار ہے ہیں۔ وہن کل انتہائی سادہ اور نجی تقریب میں ڈاکٹر گرپریت کور سے شادی کریں گے۔ دہلی کے وزیر اعلیٰ اور عام آدمی پارٹی کے کنوینر اروند کیجریوال شادی میں شرکت کریں گے۔ وزیرا علیٰ بھگونت مان کی شادی 6 سال قبل ٹوٹ گئی تھی۔ یہ ان کی دوسری شادی ہے۔

ممبئی میں بھاری بارشوں کے درمیان کئی مقامات پر پانی بھر گیا ہے۔ اس کی وجہ سے سڑکوں پر ٹریفک جام کی صورت حال پیدا ہو گئی ہے۔

مرکزی وزارت صحت کے مطابق ہندوستان میں گزشتہ 24 گھنٹوں کے دوران کورونا کے 16159 نئے کیسز درج کئے گئے۔ اس دوران 15394 مریضوں نے صحت یابی حاصل کر لی جبکہ 28 افراد کی جان چلی گئی۔ ملک میں اب کورونا کے فعال کیسز کی تعداد 115212 ہو گئی ہے۔

گزشتہ دنوں کمرشیل گیس سلنڈر کے داموں میں کمی کے بعد اب ایل ی جی کے گھریلو سلنڈر کے داموں میں اضافہ کر دیا گیا ہے۔ گیس ترسیل کمپنیوں نے بددھ کے روز نان سبسڈی والے 14.2 کلوگرام کے ایک سلنڈر پر اب 50 روپے زیادہ ادا کرنے ہوں گے۔ راجدھانی دہلی میں گھریلو سلنڈر کے لئے 1003 کی جگہ 1053 روپے ادا کرنے ہوں گے۔